El profesoráu d'asturianu y eonaviegu tamién se moviliza en defensa de la educación pública
AGORA

ADAE, asociación de docentes d'asturianu y eonaviegu, reclamen la reconocencia de la Especialidá Docente
30 may 2025 . Actualizado a las 05:00 h.Dende va unes selmanes, les y los docentes de les especialidaes de Llingua Asturiana y eonaviegu d’Educación Primaria y Secundaria tan movilizándoses xunto al restu de compañeres y compañeros d’otres especialidaes en defensa d’un sistema educativu asturianu públicu de calidá. «N’Asturies, los y les docentes llevamos años sufriendo’l despreciu institucional, la falta de recursos y la sobrecarga llaboral. El profesoráu asturianu ta fartu de promeses incumplíes y falta de diálogu per parte de la Conseyería d’Educación», denuncien dende ADAE.
Por estes causes, los docentes sumáronse a la xornada héstorica de reivindicación, considerando como urxente y xustu la inclusión real con recursos y profesoráu especialista suficiente p’atender a les diferencies individuales del alumnáu, la equiparación salarial, la derogación del Plan d’Evaluación Docente, la reducción horaria pa mayores de 55 años, la reducción de burocracia y un nuevu alcuerdu de plantiyes pa estabilizar al profesoráu y cubrir les necesidaes reales de los centros.
Sicasí, denuncien que'l profesoráu d’asturianu y eonaviegu lleven dende’l cursu 84/85 siendo interín de manera inexorable. "La falta de reconocencia de les nuestres especialidaes per parte del Ministeriu d’Educación torga que se convoquen unos procesos de concursu-oposición que nos equiparen al restu de docentes", añeden. Énte ello, reclamen la "necesidá urxente de diálogu ente alministraciones pa que se reconoza la Especialidá Docente de Llingua Asturiana y Eonaviegu y compromisos reales col restu de reivindicaciones qu’afecten al conxuntu del profesoráu asturianu.