El recintu ferial Luis Adaro convirtióse'l sábadu pasáu nel epicentru de la música indie n'Asturies
26 may 2025 . Actualizado a las 16:34 h.VibraMahou apostó un añu más por Xixón como una de les sedes del so particular festival, el VibraMahou Fest, onde dellos de los meyores grupos indie de la escena estatal pasaron pel escenariu instaláu nel recintu ferial Luis Adaro mientres doce hores ininterrumpíes. L'eventu llegaba col cartel d'entraes escosaes dende cuantayá y la cita nun defraudó.
El festival entamó colos buses llegaos dende delles puntos d'Asturies y l'actuación del DJ Edu Romero, que diba dar pasu a la primer actuación nel escenariu, la de los asturianos Los Acebos. Dempués, el turnu yera pa DJ Kapi y el conciertu de Barry B, onde sobre manera xente mozo ocupaba les primeres files. Sandra Dee fixo lo propio en la zona de DJ enantes del siguiente conciertu.
Niña Polaca xubió al escenariu del VibraMahou faciendo un repasu a los mayores ésitos de la so carrera, como M., Los días malos o Mucho tiempo contigo, nun conciertu d'intensidá marcáu pola entrega del públicu con casi tolos cantares. Tres d'ello, tiempu de nuevu pa los DJ Set, esta vegada con Mr. Cong y, de nuevu, conciertu nel escenariu principal con Sexy Zebras. Los madrilanos arrasaron el pabellón central del recintu ferial con cantares de los sos dos postreros discos y un respetable que diba de pogo en pogo. Sonó Marisol, Días de mierda o Nena.
Pasáu l'ecuador y tres el DJ Set de Lucía Dilema, Shinova esfrutó del públicu asturianu mientres hora y media faciendo repás de los sos meyores temes col estilu propiu que los caracteriza. Otra vuelta al DJ Set, esta vegada de Mediocre y la traca final, col espectáculu de Zahara, poniendo'l ramu a otra edición d'ésitu más. La ciudá sigue entá recuperandose y con ganes de la edición viniente.