LABShop primavera 2025: toles claves del mercáu que va celebrase en Llaboral Centru d'Arte
AGORA
La edición de primavera del Mercáu d?Arte y Diseñu va tener llugar los díes 17 y 18 de mayu nes instalaciones de Llaboral Centru d'Arte y Creación Industrial de Xixón
13 may 2025 . Actualizado a las 18:27 h.Un mayu más vuelve’l LABShop, esta vegada con una edición primaveral cargada de cultura y enfocada a la participación ciudadana. El sábadu 17 y domingu 18 la cita cultural ye na Llaboral Centru d’Arte y Creación Industrial, en Xixón. A lo llargo destos dos díes van ufrise actividaes bien variaes nun espaciu que yá tien un percorríu de 17 años nesti tipu de festexos. La programación inclúi conciertos, charres, exposiciones, talleres, actividaes infantiles… Amás de la ufierta puramente cultural, habrá un mercáu con 65 puestos d’artesanía, diseñu y creación, una zona dedicada a la gastronomía con variedá de puestos de comida y tamién una barra na que mercar bebides.
El sábadu 17 entamen les actividaes a les 11.00 con Escarabayando’l LABShop. UK Asturies pa siguir a les 12.00 cola mesa redonda Moces que creen n’Asturies. A les 13.30 habrá una sesión vermú con música al cargu de DJ Set Les Greques y una posa d’actividaes hasta les 17.00. A esa hora tendrá llugar la proyección del documental Que sirva de ejemplo, de Sofía Castañón, siguida d’un alderique cola directora. Esti primer día de LABShop va zarrase col conciertu del grupu Tigre y diamante a les 20.00.
El domingu 18 abre la programación David Acera a les 12.00 nel espaciu Plat0 con un cuentacuentos dirixíu a un públicu de 5 a 105 años (sí, lleístis bien y nun ye una errata, el propiu Acera inclúi la chancia yá dende l’entamu como parte del espectáculu). A la mesma hora, Pau Santirso y María Vázquez tarán Baillando tradi con tola xente que quiera acompañar nel área exterior. Estes dos actividaes solápense tamién parcialmente col taller qu’imparte Sofía Castañón nel espaciu de la biblioteca baxo’l títulu La poesía nun da mieu, a les 12.30. Mesmo que’l vienres, la sesión vermú entamará a les 13.30, ambientada nesti casu colos sones que trai Dj Set Fañagüeta. La programación abierta de la tarde continúa a les 18.00 col recital poéticu con DJ Asturies y Galiza, voces y sones. L’autora gallega Miriam Couceiro, anguaño esfrutando d’una estancia na Residencia Lliteraria Xixón, tará acompañada de la poeta Sofía Castañón nesti alcuentru asturgalaicu. El ramu a la programación del LABShop pondrálu Ciudadano Tinta con un conciertu que tendrá llugar a les 19.00 na zona exterior.
A toles actividaes anteriormente descrites, que son totalmente gratuites hasta completar aforu, súmense dellos talleres pa los qu’hai qu’inscribise previamente, varies actividaes infantiles, el mercáu y la yá comentada zona gastronómica y de terraza. Pa ampliar esta información, consultar inscripciones a los talleres o saber más sobre les exposiciones y actividaes propuestes, puen visitase les RRSS y la web de Llaboral Centru d'Arte.