Couceiro va participar en delles actividaes, ente elles un diálogu sobre feminismu cola escritora y cineasta asturiana Sofía Castañón
08 may 2025 . Actualizado a las 12:51 h.La Residencia Lliteraria Xixón recibe esti mes de mayu a la escritora gallega Miriam Couceiro, que va facer una estancia na mesma pa trabayar nos sos proyectos lliterarios. La so presencia va tener tamién una amplia axenda d’actividaes a lo llargo de tol mes.
Esti xueves va impartir un taller lliterariu na Biblioteca de Mieres y la fin de selmana va participar en dos recitales, unu en Salas y otru na Llibrería-Café La Llocura, tamién en Mieres. El miércoles 14 a les 19:30 na Llibrería-Café La Habitación propia, en Xixón, va celebrar un diálogu sobre feminismu cola escritora asturiana Sofía Castañón. Nel diálogu tendrán oportunidá de falar del momentu del movimientu feminista n’Asturies y en Galicia.
El domingu 18, de 16 a 18 hores, y dientro del programa del LABShop, nel centru d’arte de la Llaboral, va impartir un taller de bordáu lliterariu pal que ta abierta la inscripción nes redes de la Residencia Lliteraria Xixón. Darréu va participar nun recital poéticu ente poetes gallegos y asturianos dientro del mesmu eventu. Miriam Couceiro trabaya nun proyectu que tien como piedres angulares la poesía, la novela y el bordáu, esplorando entrugues clave pa la salú mental humana.
L’autora
Miriam Couceiro (A Coruña, 1985), ye escritora, socióloga, bordadora y doctora n’equidá ya innovación educativa pola Universidade da Coruña. La so infancia y adolescencia, trescurríes n’Ordes, una villa más cercana a lo rural qu'a la ciudá atlántica, marcaron permanentemente la so producción lliteraria, tatuada de métodos cualitativos d'investigación, hestories de vida de muyeres y creación d'atmósferes psicolóxiques trupes, siempres resueltes nos denominaos por Marc Augé «non llugares», esto ye, espacios vivíos na cotidianidá pero non colonizables pol ser humanu, tales como faros, trenes, estaciones, tanatorios, campusantos, parques o cualesquier otru llugar pol que toa persona pasa pero nel que nunca queda.
Miriam entamó la so trayectoria lliteraria como autora de rellatu, espublizando, en 2020 el rellatu apocalípticu O Poder da Palabra, dientro del llibru colectivu Tes Cinco Minutos, d'Editorial Galaxia y siguió la so trayectoria, un añu dempués, en 2021, como autora d'ensayu, asoleyando, cola mesma editorial, A Galiza Feminista: Tebras y Alboradas.
Rindiendo homenaxe a unu de los espacios más emblemáticos d'A Coruña, ciudá onde l'autora vive dende va más de dos décades, Miriam espublizó, en 2022, «Olimpia, princesa de Santo Amaro», un rellatu sobre la necrópolis de la ciudá espublizáu na antoloxía de rellatos O Libro da Rosa. Ye precisamente esti rellatu’l que lleva a l'autora de la mano escontra la que sedría la so primer novela, De óxido y diamantes, espublizada en 2024 y escontra la poesía, perteneciendo, dende 2023 al grupu de poetes Movidas Poética y realizando delles perfomances poétiques.
Miriam dedícase tamién a la consultoría de formación y recursos humanos, al acompañamientu d'escritores mientres el so procesu de creación lliteraria y a la organización de talleres d'escritura creativo y creación de personaxes.
Les piedres angulares de l'autora a la d'enfocar les sos creaciones son la llectura, la escritura, la investigación hestórico y biográfico según la reivindicación del activismu de lo cotidiano, la revolución de los afectos, la tenrura, los cuidos, la rabia como motor y la rotura, radical, comoquier de vida que nun respete les identidaes escoyíes o los caminos llibres de muyeres y neñes.