Ángel Fernández Artime, natural de Gozón, ye'l proprefectu del Dicasterio pa los Institutos de Vida Consagrada y Sociedaes de Vida Apostólica y ye unu de los papables
07 may 2025 . Actualizado a las 12:01 h.La Ciudá del Vaticanu ta nel puntu de mira dende que finara'l Papa Xicu va 16 díes. Sicasí, el 7 de mayu ye una fecha clave onde les mires hacia la sede central de la Ilesia Católica se doblen. Cuando esta mañana'l maestru de celebraciones llitúrxiques del Vaticanu pronunció les pallabres «extra omnes», que quier dicir «toos fuera», a les 10 de la mañana, van ser 133 los cardenales de 71 estaos diferentes qu'asistan a la misa «pro eligendo Pontifice», onde se-yos convida a dirixise a la Capiella Sistina.
Yá pela tarde, a les 16:30 hores, van entamar les votaciones pa elexir al Papa nuevu, el númberu 267, onde va tar presente'l cardenal asturianu Fernández Artime que, magar de la so edá, nun ta nes quinieles que los espertos vienen asoleyando nestos díes últimos. Esta tarde va votase per primer vez y va haber votaciones tolos díes hasta que la fumata seya blanca (dos pela mañana y dos pela tarde). Pa ello, el candidatu necesita 89 votos de los 133 cardenales con posibilidá d'elexir. Esta mesma tarde va vivise la primer fumata y, nel momentu qu'apaeza'l fumu blancu, podrá dicise la famosa frase «habemus Papam».
Dos llinies estremaes na elección del Papa
Dende los díes previos al cónclave, marcáronse claramente dos corrientes dientro del Colexu Cardenaliciu. D'una banda, los partidarios de siguir les reformes empecipiaes por Xicu, enfocaes nuna Ilesia más inclusiva y descentralizada. D'otra, aquellos que consideren qu'estes reformes fueron escesives y prefieren volver a una estructura más tradicional y xerárquica.
El cardenal hondureñu Óscar Rodríguez Maradiaga, anque nun participa nel cónclave por superar los 80 años, espresó la so esperanza de que'l próximu papa siga col trabayu de Xicu, especialmente no que cinca a la sinodalidá, esto ye, la participación activa de tolos fieles na vida de la Ilesia. En contraste, el cardenal alemán Gerhard Ludwig Müller, conocíu pola so postura conservadora, criticó abiertamente la sinodalidá, calificándola de «simples simposios» y señalando que les reformes de Xicu desestabilizaron la institución.
Anque nun hai un favoritu claru, dellos nomes surdieron como posibles sucesores. El cardenal Pietro Parolin, actual secretariu d'Estáu del Vaticanu, ye consideráu unu de los principales candidatos, con un sofitu d'unos 40 votos. Otros nomes mentaos inclúin a Jean-Marc Aveline, Mario Grech, Luis Antonio Tagle, Robert Prevost y Pablo Virgilio David, esti postreru una sorpresa recién.
Un papable asturianu que nun apaez ente los nomes de los favoritos
La posibilidá de tener un papa d'orixe asturianu, anque improbable, nun ye imposible. El cardenal Fernández Artime, natural de Gozón y proprefectu del Dicasterio pa los Institutos de Vida Consagrada y Sociedaes de Vida Apostólica ye unu de los papables. Magar de que nun cuenta, de manera aparente, colos sofitos necesarios pa ser obispu de Roma, los cónclaves son xuntes nos que pue pasar de too y romper la dinámica que los espertos anuncien nos medios de comunicación nun ye daqué imposible.