L'artista xixonesa Covandonga Valdés Moré inaugura la so primer esposición individual nel Belles Artes d'Asturies
AGORA
La colección, allugada nes sales 10 y 11 de la Casa d'Uviéu, ta compuesta por 37 dibuxos de distintos formatos y técniques
22 abr 2025 . Actualizado a las 18:38 h.El Muséu de Belles Artes d'Asturies acueye dende esti martes y hasta el 31 d'agostu la esposición «Aparques interiores» de l'artista xixonesa Covadonga Valdés Moré. La inauguración oficial va tener llugar esta tarde a les 19 hores. L'amuesa ye un percorríu pol trabayu más recién de l'artista, realizáu na última década y dedicáu a elementos de la naturaleza.
La colección, allugada nes sales 10 y 11 de la Casa d'Uviéu, ta compuesta por 37 dibuxos de distintos formatos y técniques, 2 estampes y 8 llibros de l'artista ente los que destaquen los sos característicos «xardinos de bolsu». Dos d'estos xardinos son los que dedicó apocayá a museos asturianos: el de la Fundación Muséu Evaristo Valle, de 2019, y el del Belles Artes, de 2022, que retrata'l xardín d'estilu francés del Palaciu de Velarde.
Nes sos obres, Valdés Moré representó los distintos elementos de la naturaleza que-y trescalen durante la so observación detenida de la realidá, combinada cola so técnica. Destaquen especialmente los pinos, pumares, magnolies, semeyes de flores —especialmente les orquídees—, xardinos y montes, les aves ya insectos.
Los últimos trabayos de Valdés Moré caracterizense pol dominiu del dibuxu, el predominiu de el color y la serenidá y equilibriu de les composiciones. Una colección, en palabres del conservador d'Arte Antiguo del Muséu de Belles Artes d'Asturies, Gabino Busto, que «empobina y apunta escontra'l llau optimista de la vida», quien destacó'l mural que lluz a la entrada del espaciu espositivu sol títulu «Devoción d'estivu». Los sos trabayos evidencien amás la so almiración pol arte oriental y, cuantimás, pola pintura china, na que lleva más d'una década formándose.
La esposición cunta con un catálogu de mano que foi presentáu esta mañana, con testos de la comisaria Laura Baños y diseñu de Carmen Santamarina. En redol a l'amuesa programáronse una serie d'actividaes como talleres impartíos pola mesma artista p'averar el so procesu creativu a les persones comenenciudes.
Tanto Valdés Moré como'l director xeneral de Patrimoniu, Pablo León, y el conceyal de Cultura del Conceyu d'Uviéu, David Álvarez, que participaron na presentación de la esposición, punxeron en valor l'apuesta del Belles Artes por artistes asturianos y esposiciones temporales, que son «el complementu perfectu p'arriquecer la colección d'esti espaciu museísticu», informa Europa Press.