La nueva festividá busca fomentar la llectura, dinamizar el comerciu local y promover la producción cultural asturiana
20 abr 2025 . Actualizado a las 18:40 h.La Conseyería de Cultura, Política Llingüística y Deporte del Principáu presentó esta selmana «San Xurde», una cita cultural y gastronómica pa festexar n'Asturies el Día del Llibru'l próximu 23 d'abril. Trátase d'una iniciativa conxunta del Principáu colos gremios d'editores, llibreríes, comercios, confiteríes, panaderíes, biblioteques y Miel d'Asturies IGP.
Esta nueva propuesta, impulsada por Cultura, busca convertise n'una tradición asturiana amestada al Día Internacional del Llibru. La idea, según recueye Europa Press, ye regalar llibros y rosques creaes para la ocasión poles confiteríes y panaderíes asturianes.
D'esta miente, búscase realzar la figura de San Xurde, patrón de dellos conceyos asturianos y protagonista de lleendes locales como la del cuélebre de Zalón (Ayande), pa convertilu nun iconu de la fiesta asturiana del llibru.
La iniciativa, frutu de la collaboración ente'l sector editorial, panaderu, confiteru, apícola y comercial asturianu, plantega celebrar esta xornada con un xestu doble: regalar un llibru y una rosca de San Xurde, ellaborada artesanalmente en dos versiones -salada y dulce- por panaderíes y confiteríes. Les rosques van tar disponibles en tamañu individual y con ingredientes de calidá como'l miel d'Asturies IGP.
La nueva festividá busca fomentar la llectura, dinamizar el comerciu local y promover la producción cultural asturiana al traviés d'una celebración singular y enraizada n'elementos propios de la identidá asturiana. Amás, pretende crease un venceyu ente'l llibru y la tradición, facilitando asina la participación ciudadana en redol a una fecha simbólica.