Esta inicativa llega tras l'aumentu del 1,2% del alumnáu matriculáu en Llingua Asturiana y Lliteratura, la cifra más alta rexistrada nos últimos años
07 abr 2025 . Actualizado a las 11:44 h.La Conseyería d'Educación del Principáu arranca esti llunes una campaña pa «incentivar la matriculación» en llingua asturiana y gallego-asturiana nel próximu cursu escolar, que va dirixida al alumnau de primaria, secundaria y bachilleratu en centros sosteníos con fondos públicos.
Esta iniciativa, que lleva por lema 'Apúntome', tien como oxetivu promover «la diversidá llingüística y cultural», destacando los beneficios d'estudiar estes llingües propies en les distintes etapes educatives y el su vínculu coles señes d'identidá asturianes, tal co esplica'l Principáu n'una nota de prensa.
Pa ello, la campaña va utilizar «un diseñu visual curiosu y un llinguaxe senciellu adecuau a tolos públicos y non sexista», amás d'una estratexa d'espardimientu multicanal que combina medios tradicionales con plataformes dixitales como Facebook y Instagram. Tolos conteníos van etiquetase col hashtag #educallingua.
Campaña en tres fases
La campaña va desenvolvese en trés fases, empezando esti llunes, 7 d'abril, y va estendese hasta'l 11 d'abril n'una primera fase, previa a la Selmana Santa.
Tres una breve pausam va volver a entamase del 21 al 25 d'abril, coincidiendo col periodu de presentación de solicitúes d'almisión, que va tar abiertu del 21 d'abril al 6 de mayu.
El tercer ciclu va desenvolvese del 13 al 23 de xunu, pocu antes del periodu de matriculación, que va ser del 18 al 25 de xunu pa Primaria y del 30 de xunu al 11 de xunetu pa Secundaria y Bachilleratu.
Como complementu a la campaña en medios, la conseyería de Educiación va distribuyir materiales promocionales nos centros educativos en trés fases: de primeres, van unviase cartelos informativos a los colexos ya institutos; dempués, l'alumnáu va recibir folletos y bolígrafos; y nel periodu de matriculación van repartise marcapáginas col calendariu escolar del próximu cursu.
Anque la llingua asturiana ye una materia d'ufierta obligatoria en toles etapes, la so enseñanza sigue siendo voluntaria. L'alumnáu puede optar por cursala al entamu de cada cursu escolar, inclusive si n'años anteriores escoyó otra optativa.
Esta inicativa llega tras l'aumentu del 1,2% del alumnáu matriculáu en Llingua Asturiana y Lliteratura, la cifra más alta rexistrada nos últimos años. La información detallada sobre la campaña, según l'accesu a los conteníos y feches clave, ta disponible nel portal Educastur.