El Parlamentu asturianu debate si la oficialidá del asturianu ye «un derechu históricu» o una «imposición política»
AGORA
«Nun ye un privilexu, sinón un derechu», destacó Iván Llera, presidente de la Iniciativa Pol Asturianu
03 abr 2025 . Actualizado a las 13:43 h.La Xunta Xeneral del Prinicpau d'Asturies abrió un nuevu capítulu nel alderique sobre la oficialidá del asturianu y el gallego-asturianu na Comisión de Presidencia, Retu Demográficu, Igualdá y Turismu celebrada esti xueves, onde los diputaos escucharon los argumentos a favor y en contra d'una reforma que podría camudar el estatus de les llingües de la rexón.
L'alderique arrancó col enfrentamientu de postures: mientras que los llingüistas y defensores del asturianu aportunaron en que la oficialidá ye «un derechu» y «una oportunidá» pa la comidad, sectores económicos y detractores alvirtieron sobro'l so impactu nel empléu.
Prexuicios ideolóxicos sobre l'asturianu
El llicenciáu en Filoloxía Inglesa y especialista en Filoloxía Asturiana, David Guardado, fue el primeru n'intervenir nel alcuentru y defendiendo qu'Asturies ta «desperdiciando una oportunidá» al nun sumase a la realidá plurilingüe d'España. «Al negase a aprobar la oficialidá, Asturies ta arrenunciando a formar parte con voz propia del marcu d'esta España Plural, lo que supon un frenu al desarrollu y al fortalecimientu de la identidá y de la economía».
Na mesma llínea, l'investigador y escritor asturianu, Xose Ánxelu Gutiérrez Morán, argumentó que la oficialidá ye necesaria pa garantizar «la igualdá llingüística» y evitar la «discriminación histórica» que sufrieron l'asturianu y el gallego-asturianu. «Pa solucionar esta anomalía ye necesario declarar estes llingües como oficiales», argumentó.
Coincide con estes opiniones el voceru de la Xunta pola Defensa de la Llingua Asturiana, Xose Candel Méndez, que tamién aportunó en que la falta d'oficialidá xenera «discriminación» y apeló a los partíos a «dexar de lao los cálculos electoralistes» p'algamar un alcuerdu que faiga d'esti «un momentu que pue ser históricu». Na so opinión, retardar esta decisión supondría permitir la desapaición d'estes llingües, daqué que «la hestoria nun va perdonar».
Impactu económicu d'oficializar l'asturianu
Dende una perspectiva económica, l'economista Diego Barceló Larrán alvirtió sobro les posibles consecuencies de la cooficialidá. Na so comparecencia recordó qu'Asturies foi «l'autonomía que'l so PIB creció menos» nos postreros venti años y sostuvo que declarar la oficialidá «sería afondar nesti enclín», al aumentar los costos de producción y amenorgar la inversión y l'empléu.
En contraste, Esther Prieto Alonso, representante del sector editorial, destacó'l potencial económicu de la oficialidá pa les industries creatives. «La oficialidá supondría un cambéu de estatus, pasando de ser una «llingua de probes» a una llingua de cultura, col consiguiente beneficiu económicu y social p'Asturies», añedió.
¿Oficializar l'asturianu supondría una tensión social?
Non toles opiniones fueron a favor de la oficialidá del Asturianu. Dende la Plataforma contra la Cooficialidá, Beatriz Rodríguez Zapico refugó la propuesta argumentando que supondría una «imposición» innecesaria y qu'Asturies «nun ye una comunidá trillingüe».
Amás, criticó que la oficialidá beneficiaría a lo qu'ella calificó como una «llingua artificial» en deterimientu de la diversidá de «los bables tradicionales» y alvirtió de que solo xeneraría tensión social. «Yo soi una persona asturiana, con padres y güelos asturianos y falo la llingua que nos enseñaron a toos na nuesa casa: el castellán», concluyó.
La oficialidá del asturianu como derechu, non privilexu
Nesta Comisión participó tamién el presidente de la Iniciativa Pol Asturianu, Iván Llera, que citó la Constitución y la Carta Europea de les Llingües Minorizaes p'aprofiar que la oficialidá «nun ye un privilexu, sinón un derechu».
Señaló que, a la so manera de ver, l'actual Llei d'Usu nun protexe a los falantes y defendió «un modelu amigable» afechu a la realidá asturiana, poniendo d'exemplu a Galicia, onde «la oficialidá nun foi una torga, sinón un motor pal desenvolvimientu económicu y la cohesión social».
Pela so parte, dende la Xunta pola Defensa de la Llingua Asturiana, Juan Manuel Gonzalo Miranda, defendió que la oficialidá siempre foi una «reivindicación histórica» y que, pa él, ye la única opción pa garantizar «la supervivencia del asturianu y del gallego-asturianu», informa Europa Press.