Esta midida respuende a los compromisos recoyíos na llei de presupuestos y tien por oxetu afondar na guerra contra la burocracia, ameyorar los servicios públicos y adaptalos a les nueves necesidaes de la ciudadanía
31 mar 2025 . Actualizado a las 18:40 h.El Conseyu de Gobiernu del Principáu de Asturais aprobó'l segundu espediente de cambéu de los instrumentos d'ordenación de los puestos de trabayu d'anguaño, col que se refuerza principalmente l'atención a la dependencia y la discapacidá, según la prevención de riesgos llaborales. En concretu, créense 57 nuevos puestos ente distintes conseyeríes y organismos.
Según informó'l Gobiernu, esta midida respuende a los compromisos recoyíos na llei de presupuestos y tien por oxetu afondar na guerra contra la burocracia, ameyorar los servicios públicos y adaptalos a les nueves necesidaes de la ciudadanía. L'espediente aprobose col respaldu mayoritariu de les organizaciones sindicales presentes na Mesa Xeneral de Negociación.
Na Conseyería de Presidencia, Retu Demográficu, Igualdá y Turismu inclúyese una xefatura de sección na área d'Impulsu Demográficu y un técnicu d'asistencia xurídica en violencia de xéneru pal Centru de Crisis; na Conseyería de Facienda, Xusticia y Asuntos Europeos un psicólogu y un trabayador social pal Institutu de Medicina Llegal; y na Conseyería de Salú un xestor, algunos perfiles alministrativos, trabayadores sociales, un enfermeru y un terapeuta ocupacional pa los centros de valoración de discapacidá.
A esos añeden los puestos de la Conseyería d'Educación, con una xefatura de serviciu (Enseñances Profesionales) y ocho auxiliares educadores pa centros docentes; los de la Conseyería de Derechos Sociales y Bienestar, con trelce nuevos puestos, ente ellos, trés trabayadores sociales pal Serviciu d'Atención a la Dependencia, trés psicólogos pa la Sección de Familia y dos auxiliares educadores pa centros de menores.
Los d'Establecimientos Residenciales d'Asturies (YERA), con diez puestos, dos alministrativos pa la área de Recursos Humanos y ocho psicólogos pa residencies; los del Institutu Asturianu de Prevención de Riesgos Llaborales: siete técnicos cimeros previstos nel plan de choque contra la siniestralidá; y los de la Orquesta Sinfónica del Principáu d'Asturies (OSPA), con un xefe de sección y un alministrativu p'ameyorar la so xestión, informa Europa Press.