Ecoloxistes reclamen un paru biolóxico que vede la pesca de l'angula la próxima temporada
AGORA
«Tamos falando de la supervivencia d'una especie», indiquen dende la Coordinadora Ecoloxista d'Asturies, énte'l continuu amenorgamientu de la especie nos ríos asturianos
28 mar 2025 . Actualizado a las 10:42 h.Acaba con marzu la campaña de pesca de l'angula, y dende la Coordinadora Ecoloxista d'Asturies vuelve a para la próxima temporada un paru biolóxico que vede les captures, tal que ta vedada'l so adultu l'anguila, énte'l continuu amenorgamientu de la especie nos ríos asturianos.
La Coordinadora Ecoloxista incide que pol amenorgamientu del importe total de vientes de los desembarcos, cada vez resulta más evidente lo fácil que resultaría declarar un paru biolóxico incentiváu, que podría nun espertar oposición tanto nos qu'efectúen la pesca dende embarcación como dende tierra.
«Tamos falando de la supervivencia d'una especie, nun tien nengún fundamentu nin sentíu que se dexe la pesca profesional de l'angula, tando vedada la de l'anguila. Nun podemos más que cuestionanos qué motivos lleven a dexar la pesca del esquil y a vedar l'exemplar adultu», indiquen los ecoloxistes.
Esplica'l colectivu que les numberoses investigaciones y estudios científicos, según recoge Europa Press, nun dexen llugar a duldes sobro la crítica situación de l'anguila europea y envaloren una perda de biomasa del 98 por ciento d'esta especie,« una cifra tarrecible que la asitia bien llejos de los límites de la so seguridá y nun dexen más posibilidá qu'un pronósticu bien pesimista sobro la so supervivencia».