El Principáu concede 4 millones n'ayudes para la meyora de la eficiencia enerxética nel sector turísticu
AGORA
Les ayudes aprobaes hasta agora van llegar a 81 negocios de 21 conceyos
18 mar 2025 . Actualizado a las 13:27 h.El Gobiernu d'Asturies, al traviés de la Conseyería de Presidencia, Retu Demográficu, Igualdá y Turismu, aprobó un nuevu llote d'ayudes para ameyorar la eficiencia enerxética y fomentar la economía circular nel sector turísticu. Esti paquete suma 2.984.116 euros a los 918.753 euros yá concedíos y va financiar los proyectos de 55 empreses. El Principáu yá autorizó 3.902.869 euros nel marcu d'esta convocatoria, destinada a tresformar y amontar la rentabilidá de les empreses turístiques.
Les ayudes aprobaes hasta agora van llegar a 81 negocios de 21 conceyos y tomen una amplia gama d'inversiones, con aportaciones que van dende los 1.500 a los 296.176 euros, según informó'l Principáu en nota de prensa esti martes.
La convocatoria, que recibió solicitúes de más de 250 negocios, ta enmarcada nel Plan de Recuperación, Tresformamientu y Resiliencia y cuenta con una dotación total de 11,2 millones.
L'oxetivu prioritariu ye amontar la rentabilidá de les empreses mientres s'amenorga l'impactu ambiental, una y bones un menor consumu enerxéticu supon un aforru nos costos operativos.