Iniciativa pol Asturianu reclama a l'alcaldesa d'Avilés que rectifique y recupere la conceyalía de Normalización Llingüística
AGORA
L'asociación confía en que la reorganización del gobiernu nun suponga una mengua na presencia del idioma
21 feb 2025 . Actualizado a las 12:13 h.Iniciativa pol Asturianu llamenta la decisión de l’alcaldesa d’Avilés de suprimir la conceyalía de Normalización Llingüística p’arrequexar estes competencies nel área de Cultura y Festexos y teme qu’esta decisión vaya suponer pasos atrás na visibilización del idioma. La entidá de reivindicación llingüística considera qu’esta midida, consecuencia de la reorganización del equipu de gobiernu municipal, ye una mala noticia pal asturianu. «Nun s’entiende qu’un gobiernu sosteníu por dos partíos políticos (PSOE y IX) que lleven la oficialidá nel programa electoral rebaxen el rangu de les competencies nesta materia. Vamos tar sollertes pa denunciar tolos pasos atrás na presencia del asturianu na actividá municipal», anunciaron dende l'asociación.
Al traviés del so presidente, Iván Llera, Iniciativa pol Asturianu amosó yá hai unos díes la preocupación de la entidá pola situación na que quedaría la política llingüística na nueva organización del equipu de gobiernu. L’asociación considera fundamental caltener el compromisu cola normalización y la visibilización del idioma y destaca que ye’l momentu d’afondar nello en tola acción de gobiernu. «Queremos que la presencia del asturianu siga medrando en toles estayes municipales», apunten.
L’asociación yá treslladó al Conceyu al entamu de la llexislatura delles propuestes en materia de normalización llingüística que siguen enriba la mesa. Ente elles, figuren la posibilidá de crear un muérganu consultivu relativu a la política llingüística nel Conceyu, asina como l’aprobación d’un Plan de Normalización que fixe los oxetivos y midíes nesta materia a lo llargo d’esta llexislatura. Tamién la necesidá d’incorporar el drechu de la ciudadanía a dirixise n’asturianu al Conceyu bien mediante la modificación del reglamentu o al traviés d’una ordenanza específica.
Iniciativa pol Asturianu valora los avances que se consiguieren nos dos últimos años d'Avilés y anima a la conceyala de Cultura y Festexos, Yolanda Alonso, a dar continuidá a estes polítiques. «Ye fundamental caltener el compromisu llingüísticu y la presencia normal del idioma nes actividaes que s'entamen dende la conceyalía. Amás, l'área de Festexos ye una ferramienta mui afayaiza pa normalizar l'idioma».