La propuesta ganadora llevó´l 35 % de votos
30 dic 2024 . Actualizado a las 18:12 h.Del 17 al 23 d’avientu, l’Academia de la Llingua Asturiana (ALLA) convocara una votación pa escoyer el neoloxismu del añu 2024, col compromisu d’incorporalu al Diccionariu de l’Academia de la Llingua Asturiana (DALLA). Les propuestes, toes cinco, formaben parte del material de trabayu que la comisión lexicográfica de l’ALLA tresna, estudia y valida periódicamente pa l’actualización del DALLA, principal fonte normativa de tipu léxicu de la llingua asturiana: diccionariu.alladixital.org.
Con un 9 % de votos, la propuesta menos votada foi «posverdá», siguida de «llimpieza étnica» y «refuxu climáticu», con un 12 % y 14 % de los votos respeutivamente. Les dos propuestes favorites foron «troliar» con un 31 % de los votos y, la ganadora, «intelixencia artificial», que llevó’l 35 %.
Acordies coles riegles lexicográfiques de redaición poles que se rixe’l DALLA, amestaráse a mou de fras fecha dientro de les definiciones d’intelixencia y d’artificial, de la manera que sigue darréu:
intelixencia, la: sust. Capacidá [que se tien pa razonar, pa pescudar, p’asimilar conceutos]. || Intelixencia artificial, disciplina teunolóxica [que s'encarga del estudiu y programación de sistemes con capacidá pa funcionar de manera asemeyada al pensamientu humanu]. 2 Capacidá de les máquines y los programes informáticos [pa funcionar de manera asemeyada al pensamientu humanu].
artificial: ax. Que ta fechu por mano o actividá del home. 2 Falsu, non natural. || Fueos artificiales, esplosivos [que, llanzaos al cielu, dibuxen lluces y colores vistosos]. || Intelixencia artificial, disciplina teunolóxica [que s'encarga del estudiu y programación de sistemes con capacidá pa funcionar de manera asemeyada al pensamientu humanu]. 2 Capacidá de les máquines y los programes informáticos [pa funcionar de manera asemeyada al pensamientu humanu].