El quintetu publica un EP con cinco temes protagonizaos pola música electrónica, la tradición, los ritmos pal baille y la sororidá
01 dic 2024 . Actualizado a las 05:00 h.Yá ta a la venta y en toles plataformes musicales 286 Llunes, el tercer trabayu d’Herbamora. Esta banda formada por cinco muyeres percusionistes y cantantes venceyaes a la cultura tradicional torne, dempués de 11 años de parón, con un trabayu discográficu enllenu de presencia y sensibilidá integráu por cinco cantares nos que les percusiones, el xuegu de voces y la electrónica son protagonistes. El 22 de marzu van llevalu al directo enriba l’escenariu de La Benéfica.
Herbamora revolucionaron el mundu de la pandereta asturiana en 2007 col discu ¡Sali, L.luna! Fueron les pioneres en llevar esti instrumentu a sonoridaes nunca enantes esperimentaes; fusionando la música tradicional con electrónica, jazz o rock. Los cinco cantares que formen 286 Llunes son, agora, una nueva revolución. Los patrones y estructures tradicionales a ritmu de panderos, panderetes y castañueles; les voces y el protagonismu de la música electrónica enllenen de color un discu mui novedosu dientro de la música asturiana. Nél hai dende momentos más intimos y seles, hasta pasaxes capaces de tresportate a una especie de rave tradi. Too ello ensin perder de vista la so esencia: la tradición y los ritmos pal baille.
D’esta manera 286 Llunes ta formáu por un valse de Tresmonte —nel qu’apaez Concha’i Clara, una de les pandereteres referentes n’Asturies, güela d’Elena, componente del grupu—; dos sones d’arriba (de los conceyos de Cangas del Narcea y de Quirós); una siega de Riballagu (Senabria) y un l.lixeru de Payares. Too ello con unes lletres basaes na tradición qu’espellen temátiques como l’amor, disfrute, muerte, desamor, llabores cotidianes o naturaleza. Faen asina que lo que cantaben les güeles asturianes lleguen hasta los nuestros díes, sorrayando la necesidá del amor propiu, l’empoderamientu femenín y el poder de la sororidá nuna sociedá individualista y heteropatriarcal.
Sororidá y empoderamientu
Precisamente, esa sororidá marca un trabayu producíu por Ruth Suárez. Ella ye la so profesora de técnica vocal y cantu, cola que lleven años entrenando les sos voces y iguando musicalmente los temes. L’aciertu ye enorme, como lo ye tamién la collaboración cola diseñadora Cristina Redondo y cola fotógrafa Leti Cernuda, encargaes de da-y tola forma a un EP enllenu de sensibilidá. Foi un actu d’empoderamientu colectivu dientro d’un procesu nel que la grabación tuvo llugar n’OVNI Estudio de Llanera.
Tres la publicación de N’Acústicu (2013), nun había meyor manera de volver dempués d’once años qu’asoleyando esti 286 Llunes. L’EP va tar acompañáu d’una xira na que van entemecese dos formatos de directu: espectáculu audiovisual con collaboraciones y conciertos en formatu más pequeñu. La espera pagó la pena, porque como dicen les propies Herbamora: «Volvemos más segures y con más fuercia. Fueron once años de silenciu pa volver faciendo ruiu de la meyor forma que sabemos, que ye cantando y tocando».