Seis finalistes van competir pol I Premiu Obdulia Álvarez «La Busdonga» d'asturianada
AGORA
El xuráu del certame escoyó pal so pase a la final a dos aspirantes por caúna de les modalidaes que toma'l gallardón
25 nov 2024 . Actualizado a las 16:19 h.La primer edición del Premiu d'Asturianada Obdulia Álvarez «La Busdonga», convocáu pol Gobiernu d'Asturies, yá tien finalistes. Los escoyíos son Lorena Corripio López y Alicia Villanueva Megido, en categoría femenina; Sergio Menéndez Fernández y Carlos Velasco Montes, na masculina, y Néstor Díaz González y Marina Carbajosa González, na moza.
El xuráu del certame escoyó pal so pase a la final a dos aspirantes por caúna de les modalidaes que toma'l gallardón: absoluta femenina, absoluta masculina y moza, depués de les trés semifinales que se celebraron esti mes en Cangas, La Pola Siero y La Felguera.
La final va celebrase'l vienres, 29 de payares, nuna gala nel Teatru de la Llaboral de Xixón, a les 19.00 hores. Mentes que'l xuráu delibera, van cantar dos intérpretes consagraos na canción asturiana: Mari Luz Cristóbal y Jorge Tuya. La entrada ye gratuita, pero hai que retirala enantes nes taquilles habilitaes o al traviés de la web de Llaboral Ciudá de la Cultura.
La Conseyería de Cultura, Política Llingüística y Deporte destina una suma de 15.000 euros a esti gallardón, distribuyíos en 6.000 pa la categoría masculina, 6.000 pa la femenina y 3.000 pa la moza. Con esta iniciativa, busquen promover y promocionar la canción asturiana, una de les manifestaciones culturales más significatives de la comunidá, declarada bien d'interés cultural (BIC) de calter inmaterial en 2015.
Cultura escoyó la figura de Obdulia Álvarez Díaz, más conocida como La Busdonga, pa dar nome a esti certame de música asturiana pa reivindicar la trayectoria d'una muyer que na primer metá del sieglu XX s'impunxo a los estereotipos de la dómina y destacó pol so talentu musical, informa Europa Press.