El vienres 22 de noviembre va celebrase la segunda sesión del III Ciclu de poesía QED
AGORA
El QED ye un conxuntu de recitales poéticos que se celebra na Biblioteca Ramón Pérez de Ayala n?Uviéu a lo llargo de la seronda de 2024
18 nov 2024 . Actualizado a las 17:03 h.La segunda sesión de la tercer edición del Ciclu de poesía QED va ser n’Uviéu’l vienres 22 de noviembre a les 19,00h.
El QED ye un conxuntu de recitales poéticos que se celebra na Biblioteca Ramón Pérez de Ayala n’Uviéu a lo llargo de la seronda de 2024. Esta serie d’eventos axunta, como tolos años, los versos de poetes asturianos colos de xente bien relevante de la lliteratura d’otres zones d’Europa, como Croacia, Italia y Polonia, nesta edición.
Estos encuentros poéticos, coordinaos pol poeta Miguel Rodríguez Monteavaro (XXX Premiu Xuan María Acebal de Poesía 2024), cunten con una ayuda económica de la Conseyería de Cultura, Política Llingüística y Turismu del Principáu d’Asturies, baxo la etiqueta Asturies Cultura en Rede. L’oxetivu principal del ciclu QED ye promocionar y dar voz a los y les poetes en llingua asturiana y gallegu asturianu fuera d’Asturies y trayer dellos referentes qu’escriben n’otres llingües como exemplu de lo que se ta faciendo actualmente n’otres árees d’Europa. Amás el QED nació col enclín de ser un puntu d’encuentru pa les diferentes xeneraciones y estilos de poetes asturianos, buscando siempre la calidá y la visión de futuru lliterariu.
Nel segundu recital, que se va celebrar el día 22 de payares a les 19,00h, van poder escuchase los escritores María Fernández Abril, ganadora del premiu Asturias Joven de Poesía en 2022; Milio Ureta, un multipremiáu poeta asturianu, y la italiana Dr. Valentina Colonna, una de les voces con más proxección internacional de la poesía italiana moderna. Amás esi vienres 22 de payares a les 10,00 h. nel Aula A-22 del Campus de Santuyano de la Universidá d’Uviéu va presentase’l proxectu «Voices of Spanish Poets» de la Dr. Valentina Colonna, que ye un corpus de grabaciones de poetes del Estáu español nel que s’inclúin les de los poetes asturianos actuales.
El primeru de los recitales d’esta tercer edición del QED foi’l vienres 25 d’ochobre a les 19,00h y nél pariticiparon los poetes asturianos Sofía Castañón y Daniel García Granda xunto col croata Marko Poga?ar, unu de los más afamaos poetes mozos europeos contemporáneos.Pa rematar los recitales d’esti añu, el día 13 d’avientu a les 19,00h, van poder sintise los poemes de Fran Fernández Álvarez, últimu ganador del prestixosu Premiu Letraversal con un poemariu n’asturianu, Bertán Piñán, la decana de les lletres asturianes, y Marta Eloy-Cichocka, la voz más irreverente de la poesía actual polaca.
Depués de la primer edición del QED, onde se dieron cita, ente otros, Xaime Martínez, Marta Mori, Olga Novo, Nacho Vegas, Xuan Bello y Bernardo Atxaga, la segunda edición d’esti ciclu de poesía nun defraudó a les persones amantes de la bona lliteratura, pues nella axuntáronse nomes como Niño de Elche, Sergio G. Camblor, l’actual Premiu Nacional de Poesía Chus Pato o’l Premiu Nacional de Narrativa Kirmen Uribe.
Esta tercer edición del QED ye la confirmación de qu’a los asturianos y asturianes la poesía nun los intimida, sinón que los estimula.