Nueve de cada diez asturianes menores de 64 años sobreviven al cáncanu de mama un llustru dempués del diagnósticu
AGORA
Salú amplía'l plan de peneráu a partir d'esti exerciciu y en 2028 va algamar a toles muyeres de 50 a 74 años
19 oct 2024 . Actualizado a las 05:00 h.Nueve de cada diez muyeres asturianes menores de 64 años con cáncanu de mama sobreviven a la enfermedá cinco años dempués del diagnósticu, según la Rede Española de Rexistros de Cáncer. Esti datu ta rellacionáu cola alta participación nel peneráu, que nel Principáu supera'l 70%; cola calidá del sistema sanitariu y coles meyores nos tratamientos. Per enriba d'esa edá, la supervivencia ye llixeramente inferior, anque supera llargamente'l 80% per debaxo de los 74 años.
Cada añu diagnostíquense n'Asturies alredor de 830 cáncanos de mama invasivos. Dende los años 90 del sieglu pasáu, les tases d'incidencia amosaron un aumentu sosteníu, con un crecimientu media añal del 1,5%. Esa xubida reparóse especialmente en muyeres de 60 a 69 años, ente que los grupos d'edá más nueves presenten menores aumentos, posiblemente gracies al diagnósticu precoz que facilita'l programa de prevención d'esta patoloxía.
La campaña de peneráu empezó n'Asturies en 1991 y nestos momentos algama una cobertoria añal percima del 85%. La participación supera en términos xenerales el 70%, a escepción del añu 2020, en plena pandemia de la covid, cuando s'asitió nel 69%.
Por cuenta de la conmemoración del Día Mundial contra'l Cáncanu de Mama, la Conseyería de Salú recuerda que va ampliar de forma progresiva'l programa de detección precoz a les muyeres de más de 70 años. D'esta miente, en 2028 el peneráu estenderíase a toles muyeres de 50 a 74 años. Hasta agora, les muyeres salíen del programa al cumplir los 70 años.
Esta decisión va dexar que'l próximu añu'l programa públicu algame a les muyeres de 50 a 71 años, en 2026 va llegar a les de 72 años, en 2027 a les de 73 y, a lo último, en 2028, a toles de 50 a 74 años.
Na actualidá, la conseyería llama a unes 150.000 asturianes a participar nel programa. Dende anguaño, va convidar a otres 8.000 más añalmente, mientres qu'en 2028 espérase convocar a cerca de 200.000 muyeres en total.
Salú tamién pretende ameyorar la cobertoria de la población diana por aciu la organización de les cites de les muyeres de nueva incorporación pola so fecha de nacencia. Nesti sentíu, la conseyería trabaya na implantación d'un nuevu sistema d'información pal programa de peneráu, col fin de facilitar el llabor asistencial de les unidaes de detección precoz. Esta midida va dexar una evaluación del programa de manera más áxil.
El gobiernu tamién busca promover l'analís y el consensu ente profesionales en relación col usu de les nueves tecnoloxíes disponibles y les indicaciones d'estudios complementarios.