Los documentales asturianos «Los últimos pastores» y «El amigo de todos» van xirar na seronda asturiana con La Cinemateca Ambulante
AGORA
La cartelera d'esta iniciativa inclúi tamién otros títulos como «In Water», de Hong Sang-soo o'l llargu d'animación «Dunia y el eco del tambor»
14 oct 2024 . Actualizado a las 13:59 h.El ciclu de cine itinerante La Cinemateca Ambulante de Llaboral Cinemateca echa a rodar un trimestre más pa llevar el meyor cine actual a los conceyos asturianos. Un total de 21 conceyos sumáronse esti trimestre a esti veteranu programa itinerante que va ufiertar 87 proyecciones en 23 sedes participantes.
Nel so apueste por espublizar el talentu asturianu y les producciones realizaes por cineastes d'Asturies, La Cinemateca Ambulante ufierta esta seronda una cartelera na que destaquen dos documentales asturianos, El amigo de todos, dirixíu por José Antonio Quirós, y Los últimos pastores, de Samu Fuentes, dambos premiaos na pasada edición del Festival Internacional de Cine de Xixón.
El amigo de todos va abrir la programación mañana, 15 d'ochobre, na Casa de Cultura de Cangues d'Onís. Nesti documental, José Antonio Quirós rastrexa la figura de Auke Bert Pattist, un nazi que perteneció a les Waffen SS y fuxó a España dempués de la II Guerra Mundial hasta que s'estableció n'Asturies. Esta hestoria narrada en retrospectiva naz de les alcordances d'un neñu esteláu por aquel home que frecuentaba'l chigre de los sos padres en Ribeseya. Esi neñu, güei adultu, restola ente vieyos periódicos, pruebes xurídiques y barruntos que difuminan la reconstrucción del nazi qu'abruxó la so mirada infantil. La obra recibió'l Premiu del Públicu nel Festival Internacional de Cine de Xixón 2023.
Pela so parte, en Los últimos pastores, el cineasta noreñense Samu Fuentes lleva la so cámara al corazón de los Picos d'Europa pa, con gran sensibilidá y cercanía, retratar l'ocasu d'un mundu en cantu de la so desapaición. Protagonicen esta película documental los hermanos Fernando y Manolo Mier, dos de los postreros pastores que queden nos Picos d'Europa. Nuna contorna onde munchos nun llograríen sobrevivir, ellos esfruten de la vida. Son lleenda y memoria de Picos, al mesmu nivel que'l Urriellu o'l llobu. Una manera de vida y una sabiduría que pueden desapaecer con ellos. Estrenáu mundialmente na sección Retueyos del 61 FICX, esta película, patrocinada por Llaboral Cinemateca, alzóse col Premiu RTPA al Meyor Llargumetraxe Asturianu. Amás, el Xuráu de Cine Español concedió a esti llargumetraxe una mención especial del Premio DAMA a meyor guion de película española.
Tamién na cartelera de seronda de La Cinemateca Ambulante atopamos la película arxentina Puan, dirixida por María Alché y Benjamín Naishtat. Nesta comedia Marcelo Subiotto y Leonardo Sbaraglia dan vida a Marcelo y Rafael, dos profesores desaxeradamente opuestos nos sos estilos y pedagoxíes que compiten nuna batalla ensin cuartel pola mesma cátedra.
En In water, Hong Sang-soo propónnos una cuidada reflexón sobre l'amor, sobre'l cine y sobre la creación. Na so nueva película, un mozu actor decide dexar la interpretación y poner a prueba la so creatividá, rodando un curtiumetraxe cola ayuda de dos antiguos compañeros de clase. Los trés van viaxar a la isla de Jeju y mientres analayen pola mariña en busca d'inspiración, Seoungmo acolumbra a una muyer na sablera y avérase a falar con ella. Esti singular alcuentru y un alloñáu cantar d'amor inspirarán-y nel rodaxe de la so película.
Completa'l programa del trimestre'l llargumetraxe d'animación Dunia y el eco del tambor que va poder vese en 14 conceyos y que se programó nel marcu de les celebraciones del Día Internacional del Migrante, que la UNESCO conmemora'l 18 d'avientu. Dunia y los sos güelos instálense en Canadá, un nuevu país que, magar de ser fríu, convirtióse na so templada casa d'acoyida dempués de colar de Siria. Ellí van atopar munches coses distintes: la llingua, comíes desconocíes y estaciones que nun vivieren enantes. Magar d'esta diversidá, Dunia y los sos güelos afayen la guapura de la multiculturalidá, mientres faen nueves amistaes. Al traviés de la so relación con Rosalie y Miguizou, Dunia vese arrastrada al mundu de la música, afayando un poder tresformador qu'alluma la so nueva vida.