La Sección Oficial Albar va estrenar n'España los nuevos llargos de Patricia Mazuy, Matthias Glasner, Joel Potrykus o Matías Piñeiro
09 oct 2024 . Actualizado a las 11:28 h.La cineasta francesa Patricia Mazuy, a quien el Festival dedicó un focu na so 60 edición, vuelve cuntar cola estraordinaria Isabelle Huppert pa interpretar en La prisonnière de Bordeaux (Francia). Huppert y Hafsia Herzi dan vida a dos muyeres de clases sociales engarraes que desenvuelven un fuerte venceyu tres coincidir nes visites a la cárcel de los sos respectivos homes. La directora de Peaux de vaches, que la so obra se caracteriza pola so elegancia y por cierta crudeza, va estrenar el so últimu trabayu n'España na Sección Oficial Albar del 62 FICX.
Vulcanizadora (Estaos Xuníos) ye la nueva película de Joel Potrykus, una de les miraes más singulares del cine independiente norteamericanu, de quien vimos Relaxer mientres el FICX en 2018. Devastador na so llectura sociopolítica de l'América actual, el filme entemez referencies a Dostoyevski o Sartre con guiños a obres de xéneru como Cares of Death o la saga Saw. La cinta presentaráse en Xixón tres el so pasu pol Festival neoyorquín de Tribeca, onde l'actor Joshua Burge llogró una Mención Especial.
El cineasta arxentín Matías Piñeiro repite nel FICX tres participar en 2020 con Isabella y en 2021 con Sycorax (curtiumetraxe dirixíu xunto con Lois Patiño). Les sos películes fueron galardonaes en festivales internacionales como Locarno, BAFICI o Mar de Plata. Filmada en 16 mm con una cámara Bolex, Tú me abrasas (Arxentina, España) constrúi'l so universu a partir de la mitoloxía griega. Tres les sos aventures shakesperianes, Piñeiro atrevióse nesta ocasión con Los diálogos con Leucó de Cesare Pavese, nos que la poeta Safo reflexona xunto a la ninfa Britomartis sobre'l deséu y la muerte. La película compite na Sección Oficial Albar tres el so pasu pola Sección Encounters de la Berlinale. Matthias Glasner firma Dying (Alemaña), una estraordinaria película percorrida por un afiláu humor negru que-y hai valió l'Osu de Plata al Meyor Guion na Berlinale y dellos Premios Lola del Cine Alemán, mesmo que la pre-nominación a los European Filme Awards. Al traviés d'una estructura episódica, el director retrata con maestría'l fracasu y la redención de los miembros d'una familia.
La Sección Oficial Retueyos suma nuevos ya interesantes estrenos a la so programación
Peaches Goes Bananas (Francia, Bélxica), ye l'últimu trabayu de la directora francesa Marie Losier. Nesta ocasión, l'adalid de la semeya nel cine avérase a la famosa y prevocadora cantante y compositora canadiense Peaches y failo cola midida precisa qu'esiste ente la cara pública y privada de l'artista. Tres el focu que'l FICX dedicó en 2011 y de presentar en Xixón Cassandro The Exotico! (2018) y Felix in Wonderland (2019), Losier torna a la Sección Oficial Retueyos con Peaches Goes Bananas, obra que tuvo'l so estrenu mundial nel Festival de Venecia.
January 2 (Hungría) ye'l segundu llargumetraxe de Zsófia Szilágyi, directora que'l so debú (One Day) compitió nel FICX en 2018 tres llograr el Premiu FIPRESCI na Selmana de la Crítica de Cannes. Brillantemente interpretada y con una brengosa puesta n'escena, January 2 acompaña a una muyer que se separa del so home y camúdase colos sos dos fíos y l'ayuda d'una amiga col enfotu de reconstruyir la so vida. La película va competir na Sección Oficial Retueyos tres pasar pola Biennale College Cinema de la Mostra de Venecia.
La estelante ópera prima de Jaydon Martin, Flathead (Australia), llega a Xixón tres recibir la Mención Especial del Xuráu nel Festival de Rotterdam. Nesta conmovedora cinta de non-ficción en gloriosu blancu y negru, el prometedor cineasta retrata la ciudá australiana de Bundaberg al traviés d'un home que torna al so llugar d'orixe col enfotu de redimise y a quien el director s'avera con una desbordante sensibilidá.