Miguel Rodríguez Monteavaro gana'l XXX Premiu «Xuan María Acebal» de poesía n'asturianu

El poemariu «Al disparar nunca parte», del escritor bualés Miguel Rodríguez Monteavaro, lleva’l Premiu «Xuan María Acebal» na so trentena edición. El certame, convocáu pola Conseyería de Cultura, Política Llingüística y Deporte, reconoz a les meyores obres poétiques escrites n’asturianu y ta dotáu con 6.000 euros. 

Al concursu podíen presentase toes aquelles obres inédites en llingua asturiana con un númberu de versos superior a 500. El xuráu del XXX Premiu «Xuan María Acebal» destacó’l testu ganador como «una biografía emocional onde rescampla la so esperimentación formal, la so ambición y la unidá temática y estilística». 

El director xeneral d’Acción Cultural y Normalización Llingüística, Antón García, presidió’l xuráu encargáu de valorar les obres presentaes al certame que convoca cada añu la Conseyería de Cultura pa fomentar la creación lliteraria en llingua asturiana. Esti equipu de persones espertes na materia tuvo compuestu por Xosé Anxelu Gutiérrez Morán, ganador de la edición anterior; Rodrigo Olay Valdés, filólogu y poeta; Iris Quintana Villa, filóloga y profesora; Pablo Suárez Fernández, filólogu y escritor, y Alba Carballo López, filóloga y profesora. 

Miguel Rodríguez Monteavaro (Bual, 1990) escribe n’eonaviegu y n’asturianu. La obra ganadora d’esta edición del Xuan María Acebal ta escrita n’asturianu. Publicó cinco llibros de poesía: Trenta razóis pra nun medrar (2020), Todos os tristes de mayo (2013), Poemas pr'amantes y paquidermos (2013), Superpoderes (2020) y Oi, que dice mamá que volvas (2023).  

Amás, Monteavaro foi ganador de dellos premios lliterarios, ente los que se pueden mentar el XIX Premiu Xeira de Narracióis Curtias, el XIX Premiu de Poesía Padre Galo, l’Asturies Moza de Poesía o’l I Premiu Ría del Eo de Poesía. Otra manera, nel 2021 algamó la beca de Residencia Asturies n’A Coruña, y nel 2023 la de Residencia Artes Escéniques de LLABoral Centru d’Arte y Creación Industrial.

---

---