La villa maliaya acueye dende güei y hasta'l domingu el festival nel que'l principal atractivu va ser Corquiéu tres cinco años ensin xubise a los escenarios
05 sep 2024 . Actualizado a las 11:36 h.Villaviciosa afina los instrumentos pa la cita más importante del conceyu a nivel músical y que, esti añu, celebra la so decimoséptima edición, na que presenten novedaes, actividaes y conciertos de grupos que llevaben un tiempu ensin xubise a los escenarios. El Festival Internacional de la Gaita entama esti xueves 5 de setiembre y va poner a baillar a la villa maliaya con música folk y tradicional hasta'l domingu 8 de setiembre, coincidiendo col Día d'Asturies.
Les actividaes del festival van empecipiar el xueves a les 18:00 hores, col entamu de la esposición «Asturies n'otra dómina: la ropa», una colección de traxes tradicionales asturianos del grupu de baille tradicional «San Félix» de Candás, que va tar abierta al públicu del 5 al 8 de setiembre. Xunto a ello, Alfonso Fernández Álvarez, conocido como «Fonsu Les Regueres», va dar la charra «Gaites con historia» a les 19:30 hores. Tres ello, va arrancar el pasucais de la Banda Gaites Villaviciosa - «El Gaitero», mientres que la xornada va pesllase col conciertu d'Anxo Lorenzo Trío.
El vienres, col entamu de la fin de selmana, entama una serie d'actividaes que van animar Villaviciosa a ritmu de gaita. La tarde va empezar cola apertura del mercáu artesanu y la actuación de la bandina de la Banda Gaites Villaviciosa - «El Gaitero» y la clase maxistral de uilleann pipe con Sylvain Barou. A esto va siguir l'actuación de la banda gaites Saxum y la visita guiada col director del grupu de baille tradicional «San Félix» de Candás pela esposición enantes mentada. Yá a la nueche, a les 21:30 hores, arranca la VIII Nueche en Danza del FIG, qu'entama coles actuaciones de Caparines, 6 Riales y el grupu de baille tradicional «San Félix» de Candás, amás d'escenariu llibre al acabar estes artistes.
La folixa alredor de la gaita sigue'l sábadu con dellos talleres, el mercáu y dellos pasucais de bandes de gaites de Galiza, Asturies y El Bierzo mientres prácticamente tol día. Pela nueche, el momentu más esperáu del festival: la nueche folk. A David Pasquet, Sylvain Barou y Rubén Bada súmase la vuelta a los escenarios de Corquiéu, la banda ribeseyana que va tocar per primer vez en cinco años. A lo último, el domingu ye'l momentu del XIV Concursu de gaiteros y gaiteres «Memorial José Huerta», actuaciones de bandines tradicionales, el conciertu de Kikirikí d'Alicia Álvarez y el V Certame de Canción Asturiana «Xavi Solares» coles voces d'Alicia Villanueva, Isaac Sierra, Luis Estrada, Rubén Barredo, Jairo Pérez y la gaita de Valentín Fuente. La nueche follk del día d'Asturies va poner el ramu a esta edición del Festival Internacional de la Gaita, coles actuaciones d'Aira da Pedra, La Tarrancha y una jam sessión pa que tola xente s'anime a tocar. La gaita va ser el soníu de Villaviciosa dende güei y hasta'l domingu, onde la folixa yá ta entamada.