La culiebra multicolor xubirá Cuitu Nigru y los Llagos de Cuadonga en dos xornaes decisives pa la ronda española
30 ago 2024 . Actualizado a las 11:47 h.La caravana de La Vuelta abandona güei mesmo les tierres gallegues nes que lleven instalaos los ciclistes del pelotón que conforma La Vuelta dende'l pasáu martes. El nuevu destín, Asturies, un territoriu qu'en toles ediciones marca diferencies na clasificación pola victoria xeneral y que, esti añu, sigue siendo decisivu nel devenir de la prueba.
Un territoriu que va ser decisivu porque la llucha pola clasificación xeneral ta más abierta que nunca no que cinca a los años caberos, onde había un favoritu claru. Magar de qu'esti añu l'eslovenu Primoz Roglic (Red Bull - Bora Hansgrohe) ye'l principal aspirante, la forma que lleva amosando mientres les etapes yá percorríes fai qu'haiga duldes nel so desenvolvimientu nesta postrer selmana de competición. Poro, ciclistes como'l mallorquín Enric Mas (Movistar Team) o l'ecuatorianu Richard Carapaz (EF Education - Easy Post) van poner a prueba al trés veces ganador de La Vuelta. A ellos, ha sumase l'aspirante sorpresa, Ben O' Connor (Decathlon - AG2R La Mondiale). L'austrialianu algamó'l maillot encarnáu nuna escapada na etapa 6 y, como fixera Sepp Kuss na edición de 2023 qu'a la fin acabaría ganando, sigue con él na so piel a día de güei.
La Vuelta aporta a Asturies con too por decidir y va ser xueza en trés etapes, magar que namás en dos va acoyer la meta. La primer xornada peles carreteres asturianes va ser esti sábadu, na etapa 14 que xune les llocalidaes de Villafranca del Bierzo y Villablino y na que van xubir dos puertos asturianos. D'una banda, el puertu de Zarréu, pel que van entrar a la comunidá. Tres d'ello y tres pasar per Cangas del Narcea, los ciclistes van afrontar la xubida al puertu de Lleitariegos enantes de poner rumbu a la meta.
La segunda xornada de la ronda española en tierres asturianes va ser cuasi íntegra n'Asturies y namás nunos quilómetros van pasar a Llión. Va ser na etapa 15 que xune L'Infiestu con Valgran-Payares.Cuitu Nigru. Una etapa mui dura con un puertu de tercera (Altu de Santu Emilianu), dos de primera (Altu de la Colladiella en dos vegaes) y unu especial (Cuitu Nigru) que, presumiblemente, va marcar munches diferencies de cara al resultáu final de la clasificación xeneral.
Tres el día de descansu, que va ser el llunes 2 de setiembre, La Vuelta va enfilar la postrer etapa d'esta edición n'Asturies, con una etapa que va cuntar col cumal más emblemáticu de la Vuelta a España, como son los Llagos de Cuadonga. La culiebra multicolor va aniciar la marcha na llocalidá gozoniega de Lluanco, pasando per Xixón y Villaviciosa enantes d'encarar la primer xubida del día, el Mirador del Fitu. Depués, pasu per Les Arriondes y Cangues d'Onís y xubida nueva a Collada Llomena, nel conceyu de Ponga enantes de volver a la capital hestórica y rematar el día cola mítica xubida a los Llagos de Cuadonga.