El Muséu del Pueblu d'Asturies edita'l llibru «La danza. Danzas de palos del suroccidente de Asturias y el valle de Forniella»
AGORA
L'autor ye Naciu'i Riguilón y la obra, que lleva un trabayu de más de venti años, va poder lleese en físicu y en dixital
29 ago 2024 . Actualizado a las 11:49 h.Les dances de palos son una seña d'identidá de munchos pueblos del suroeste d'Asturies y los sos estremeros del valle de Forniella na provincia de Llión. Ye un territoriu mui montañosu con valles fondos que comparten un paisaxe y una cultura comunes. Los asturianos pertenecen a los conceyos de Cangas del Narcea, Ibias y Degaña. Son dances d'homes, mui ceremoniales y xerarquizaes, que s'executen al son de la música d'una xipla y un tambor, que toca un mesmu intérprete. Los danzantes van vistíos de blancu con bandes cruciaes sobre'l pechu y tocaos con un sombreru de fieltru con cintes o colonies de colores. Estes dances necesiten ensayos previos y nun pueden improvisase. Amás, siempres van acompañaes d'un personaxe graciosu y grotescu, el frasqueiro o xamascón, que caltien a raya a los espectadores pa que nun molesten a los danzantes, y tamién s'acompañen d'amueses de lliteratura popular: poesíes o monólogos graciosos que se reciten nun entemediu de la danza y representaciones teatrales que se lleven a cabu los mesmos danzantes.
Estes dances tienen una llarga hestoria y tuvieron más espublizaes que lo tán na actualidá. N'Asturies yera un asuntu mui poco estudiáu. L'autor lleva más de venti años arrexuntando información histórica y etnográfica sobre elles, mesmo que sobre les fiestes nes que se baillaben. Pa realizar esti estudiu descriptivu realizó trabayu de campu, entrevistes a numberosos danzantes mayores, consultó archivos particulares y parroquiales, y, sobre manera, arrexuntó una numberosa colección de fotografíes que documenta la evolución d'estes dances.
N'Asturies, les dances de palos tuvieron a puntu de desapaecer nos postreros trenta años pol enorme éxodu rural que despobló esa parte del país, pero cuando paez que yá nun van baillase más, vuelven renacer y otra vegada vuelven xuntase doce nuevos (que na so mayoría viven fuera de los pueblos) a ensayar la danza pa interpretala'l día de la fiesta.
La danza ye una amuesa de la cohesión de la sociedá rural y tamién de la so falta de prexuicios, yá que siendo una danza esclusiva d'homes yá va tiempu que nos pueblos d'Asturies integráronse nella les muyeres ensin nengún problema nin escándalu social. Cosa que nun puede dicise d'otres celebraciones festives puramente masculines y urbanes, onde la integración de muyeres foi motivu de discutiniu y de negatives incomprensibles.
El trabayu de Naciu’i Riguilón ye meritoriu porque ufierta una documentación mui bayurosa sobre estes dances, y poro, el Muséu del Pueblu d’Asturies promovió la so publicación col fin de documentar, caltener y espublizar esti patrimoniu cultural inmaterial d'Asturies. Hai una edición en papel, que se viende nel muséu, y otra en PDF que va poder consultase bien llueu n'internet nel repositorio de los museos municipales de Xixón: fondos.gijon.es.