Les presiones del Ayuntamientu de Villaviciosa faen que desapaeza la valla d'Aína nel conceyu

Nin siquier un día duró la valla publicitaria en Villaviciosa de la campaña #Asturies2027 que'l partíu políticu Aína estrenó ayeri na zona de La Barquerina. Col lema «¿Una Asturies pal turismu? ¿O una Asturies pa quien vivimos nella?», el grupu políticu buscaba concienciar de la problemática que supón un turismu masificao, con la xubida del preciu de la vivienda, l'encarecimientu de la vida o la degradación de los servicios públicos, ente otros.

Sicasí, la empresa encargada de colocar les llones publicitaries retiró esta mesma mañana'l cartel, tres recibir el dueñu de la finca onde ta asitiada esa valla una serie de presiones dende la casa conceyu que remarcaben la necesidá d'eliminala. Una situación que namás se dio nesi conceyu, yá que les mesmes llones tan colocaes nos conceyos de Xixón, Uviéu y Avilés y hasta la fecha nun hebo quexa. La campaña, que taba contratada pa un mes, ve agora como ye censurada y la empresa ufierta a la formación un llugar nuevu, entá desconocíu, pero de xuru fuera del conceyu nel que taba asitiada.

Esta situación vien dada depués del comunicáu del Ayuntamientu, nel qu'afirmaba'l «desalcuerdu y refugu col conteníu, mensaxes y forma escoyida pa esta campaña, aprovechando amás la temporada de mayor arribación turística del añu». Amás, nel comunicáu dicíase que «dende'l respetu a la llibertá d'espresión y d'idees, manifestamos discrepancia con esta campaña, qu'entemez diverses cuestiones, problemátiques y conceptos varios rellacionándolos de forma negativa colos visitante y el sector turísticu».

---

---

---