La música protagoniza la programación d'agostu del circuitu de cultura tradicional d'«Asturies, Cultura en Rede»
AGORA
12 conceyos asturianos van cuntar cola actuación de nueve artistes d'esta iniciativa
07 ago 2024 . Actualizado a las 05:00 h.Agostu sigue cola música y la romería como principal diversión. Abre la programación del circuitu Asturies, Cultura en Rede pa esti mes el conciertu que la banda Los Gascones va ufiertar el 7 d’agostu en Ribeseya y que, con una propuesta desenfadada qu’entemez los ritmos más tradicionales col rock o’l pop, van facer baillar a grandes y pequeños. El grupu va mostrar tamién el so bon facer el día 31 en Casu y en Santalla d’Ozcos.
Llanera va acoyer el 8 d’agostu’l conciertu Corri-corri de la Orquesta Céltica Asturiana y, el día 13, La Bandina’l Fuelle va facer parada en Somiedo, onde van guiar al públicu nun percorríu, al traviés de la música, pela cultura tradicional asturiana y otres que faen frontera cola rexón. El sábadu 17 van poder escuchase los Cancios tradicionales d’Asturies de Tina Gutiérrez n’El Franco y la poética de Rubén Bada y Pepín de Muñalén va resonar el 30 de agostu en Grau.
Amás de la música tradicional, n’agostu tamién se va poder escuchar el podcast rural Dalle mio nena de Melodijopérez -los díes 17 en Cabrales y 31 en Pravia- y disfrutar de los xuegos tradicionales que VA Verdeyazul van desplegar el día 21 en Tapia. Tamién va haber sitiu pa la divulgación cola conferencia La gaita n’Asturies: del Gaiteru de Lliberdón al Conservatoriu, que va ufiertar Rodrigo Joglar el llunes 19 en Cabranes, y pa la danza y les artes escéniques más contemporánees con Aire…!, una producción de Nun Tris que llega’l miércoles 21 a Villaviciosa.