El Muséu de Belles Artes d'Asturies adquier per primer vegada un cuadru de Mariano Fortuny
AGORA
La obra va tar disponible pa la visita del públicu nel mes de setiembre y va cuntar con una conferencia de Javier Barón, especialista en Fortuny y xefe de caltenimientu de pintura del sieglu XIX del Muséu Nacional del Prado
23 jul 2024 . Actualizado a las 05:00 h.El Muséu de Belles Artes d'Asturies va incorporar un cuadru de Mariano Fortuny a la so colección permanente. Vas ser el primeru que s'esponga d'esti autor. Esti oliu sobre llenzu lleva por títulu María Luisa nel xardín (1871) y la so llegada foi posible gracies a que la Conseyería de Cultura, Política Llingüística y Deporte habilitó nel presupuestu del muséu un capítulu pa la inversión en nueves obres d'arte.
L'alquisición de la pintura de Fortuny comunicóse güei na xunta de gobiernu del muséu, presidida pola conseyera, Vanessa Gutiérrez, quien valoró «el fechu históricu que supón la llegada d’una creación de Fortuny al Belles Artes dempués de 44 años d’espera». Coles mesmes, punxo en valor el trabayu del so departamentu «p’habilitar la partida d’inversiones que dexa la compra de nueves obres d’arte pa la colección asturiana».
L'oliu sobre llenzu María Luisa nel xardín yá s'atopa n'Asturies, onde l'equipu de restauración del muséu ta desenvolviendo un minuciosu trabayu, tensando 'l llenzu y llimpiando un fongu, pa que'l cuadru lluza tola so guapura a partir de setiembre, mes nel que ta prevista la so incorporación a la colección permanente y la so presentación pública. Sicasí, l'estáu de caltenimientu xeneral de la obra ye bonu.
Al actu públicu previstu pa setiembre va cuntar con una conferencia de Javier Barón, especialista en Fortuny y xefe de caltenimientu de pintura del sieglu XIX del Muséu Nacional del Prado.
L'anunciu de la llegada del arte de Fortuny al Belles Artes ye'l resultáu de dellos meses de contactos y negociaciones col coleccionista italianu de Milán que tenía esta obra del sieglu XIX.
María Luisa nel xardín
Mariano Fortuny Marsal (1838-1874) ye unu de los principales creadores del Ochocientos español y unu de los pocos qu'esfrutó d'un estraordinariu prestixu internacional. El Muséu de Belles Artes d'Asturies cuntaba con nenguna obra de so, pero sí de munchos de los artistes que lu arrodiaron, sobre manera, mientres el tercer terciu del sieglu XIX, en que desenvolvió'l gruesu de la so producción.
María Luisa nel xardín (1871) representa a la fía del pintor, María Luisa Fortuny Madrazo, sentada nel campu y arrodiada de flores, nun llenzu de 33 por 40 centímetros.
María Luisa, nacida'l 8 de setiembre de 1868 en Roma, yera la primoxénita de la familia. Caltiénense munches referencies escrites sobre la so niñez nes que se destaca d'ella la so tenrura y la so actitú protectora escontra'l so hermanu. Fortuny pintóla en delles ocasiones más.