El branu asturianu enllénase mientres esti mes d'eventos musicales en dellos puntos de la comunidá
09 jul 2024 . Actualizado a las 05:00 h.Si entá nun sabes que facer en xunetu n'Asturies, nun t'esmolezas porque'l mes vien cargáu de música y ritmu, amás pa tolos gustos. Traémoste una guía completa pa que nun pierdas nengunu de los eventos que van enllenar de ritmu les tierres asturianes.
Xixón: Epicentru de los conciertos
En Xixón, la fiesta nun apara. Tres el fin de Metrópoli, onde actuó Natos y Waor, Amaral o La Oreja de Van Gogh, ente otros, los conciertos siguen na ciudá. Si lo tuyo ye'l rock , nun puedes perdete'l conciertu de Robe, el 12 de xunetu nel Parque de los Hermanos Castro. La so xira «Ni santos ni inocentes» promete dexar buelga. Y si esto te sabe a pocu, Xixón va convertise nel escenariu perfectu cola nueva edición del Tsunami mientres el 19, 20 y 21 de xunetu con conciertos de Yungblud, Bad Religion, Royal Blood y Scorpions.
Maizu Rock en Intriago
La zona de Cangues d'Onís tamién se va enllenar de música col Maizu Rock, que celebra'l so décimu aniversariu. Con entrada llibre, los díes 5 y 6 de xunetu vas poder esfrutar de bandes de rock nun ambiente festivo y llenu d'enerxía. Ellí van dase cita Dixebra, o Skama la Rede, ente otros munchos grupos.
L.luarca Metal Days
Los amantes del heavy metal tienen una cita obligada nel «L.luarca Metal Days» el 12 y 13 de xunetu. Esti festival axunta tanto a grupos emerxentes como a bandes consolidaes como Avalanch, ufiertando una esperiencia cargada de poder y adrenalina.
Boombastic y Reggaeton Beach Festival
Pa los fans del reguetón, xunetu tamién trai grandes eventos. El Boombastic, unu de los festivales más grandes del xéneru, va celebrase en Llanera los díes 18, 19 y 20 de xunetu. Y si quies más, Avilés va ser l'escenariu de la tercer edición del Reggaeton Beach Festival el 27 y 28 de xunetu.
Salinas Longboard Festival
Pero si pensabes qu'esto yera tolo qu'esti mes tráinos por delantre, nun t'equivoques, porque pa los amantes del mundu del skate, surf y el longboard dende'l 24 y el 28 xunetu vas poder esfrutar en Salinas del «Salinas Longboard festival», onde amás de música vas tener foodtrucks y campeonatos de skate y longboard.