Bree Delian: «Educar, inspirar y fomentar una apreciación más fonda de la música tradicional. Esos son los oxetivos»

Somiedo prepárase pa esta fin de selmana, onde va recibir a centenares de persones interesaes na música folk, convirtiendo al conceyu asturianu nel centru de la música d'esti xeneru por unos díes. Muncha culpa d'ello tienla Bree Delian, profesional multidisciplinar con esperiencia en conservación, xestión de proyeutos, creación de conteníu y componente del grupu Folk Felpeyu.

—Esta ye la primer edición del festival ¿Cuál foi la inspiración detrás d'esta nueva iniciativa que promueve la cultura y la música d'Asturies?

—Llar Trad Fest foi concebíu pa baltar barreres culturales y xeneracionales, promoviendo la tresmisión oral de la música tradicional y conectando les diverses tradiciones musicales del Arcu Atlánticu. Los nuesos oxetivos son educar, inspirar y fomentar una apreciación más fonda de la música tradicional y folclórica al traviés de clases maxistrales, actuaciones y actividaes comuñales. Un aspectu crucial na nuesa misión ye la tresmisión de conocencies. Queremos construyir una comunidá que s'espanda internacionalmente. Queremos afrontar retos como l'amenorgamientu del compromisu de los mozos o les disparidaes de xéneru y pa ello queremos usar los raigaños culturales como catalizador del cambéu social.

—Ufiertáis masterclasses con más de 30 oficios de la música tradicional ¿Que pueden esperar la xente no que cinca a conteníu y esperiencia?

—La tresferencia de conocencies ye un puntu clave del festival y la nuesa misión. El diversu profesoráu apurre gran esperiencia y talentu artísticu qu'ufierta una oportunidá única pal intercambiu cultural y l'aprendizaxe. Averanos a músicos, académicos ya instituciones d'estes naciones ayúdanos a aprender y entender. Los y les profesores pueden compartir munches técniques musicales, pero tamién aprendemos sobre les nueses diferencies y lo que nos fai únicos. Al acoyer a profesores cualificaos del otru llau del Arcu Atlánticu, establecemos un puntu de referencia alzáu nel que non solo aprendemos, sinón que tamién enseñamos. D'esta tresferencia de conocencies trata Llar. Los y les profesores non solo vienen impartir clases, tamién podemos cuntar cola so participación en meses redondes, onde compartir lo que funcionó n'otres naciones ufiertando conseyos sobre como Asturies puede aprender.

—¿Cómo respondió'l públicu y la comunidá llocal a esta nueva propuesta y qué impactu crees que va tener na preservación de la cultura asturiana?

—Tamos totalmente encantaos cola acoyida que tuvo'l festival, especialmente yá que too consiguióse col boca a boca de la xente, nun tenemos presupuestu nin financiamientu y tol marketing foi orgánicu. Al festival van asistir persones de toes partes, mesmo profesores qu'asistentes. Ye maraviyosu lo que creemos, l'acoyida que ta teniendo ente los músicos, tanto de dientro como de fuera d'Asturies. Los músicos internacionales aprecien esta plataforma pal intercambiu cultural y l'aprendizaxe. Mas de 50 músicos internacionales de llugares como Xapón o Australia amosaron el so interés por participar nel festival. La respuesta llocal nun foi como esperábemos, punxímonos en contactu con delles escueles d'Asturies, Galicia y Cantabria pa que pudieren collaborar y promover el proyectu ente los alumnos, lamentablemente, la respuesta nun foi como esperábamos, solo unes poques respondieron. L'añu que vien ye daqué que pensamos afrontar pa poder conectar meyor ya implicar a les escueles locales nel proyectu.

—¿Qué te fixo escoyer La Pola Somiedo como espaciu pal festival?

—Buscamos un llugar que pudiera acoyer a les mas de 300 persones que van asistir al festival y de la mesma que fuera una contorna rural. Queríamos alloñanos de les grandes ciudaes y poner el focu en zones rurales con una gran bayura cultural. Somiedo ufierta'l llugar perfectu p'acoyer el festival.

—Va haber visites a sitios históricos na área onde se va llevar a cabu'l festival. ¿Cuál ye'l papel d'estes visites y cómo contribúin a la inmersión cultural y el caltenimientu de la cultura asturiana?

—Tenemos grandes planes pa la próxima edición no que cinca a esto. Anguaño nun tuvimos tanto tiempu como esperábamos pa poder desenvolver la contorna llocal. Si'l tiempu dexa queremos que los y les profesores puedan usar los espacios al aire llibre y que los alumnos s'inspiren cola contorna. El pueblu tien un telón de fondu espectacular enclaváu nos montes. Tamién hai un programa dirixíu a los participantes más mozos con distintes actividaes.

—¿Cómo animáis a los neños a conectase cola cultura y la música asturianes al traviés de les actividaes del festival?

—El programa dirixíos por Mónica Acevedo, Janire Mañes, David Varela y Xosé Antón «Ambás» inclúi sesiones interactivas qu'introducen a los neños nos fundamentos de la música al traviés del cantar el baille y la interpretación instrumental. L'oxetivu ye encender l'interés y l'allegría, alimentando una pasión pa tola vida pola música y la cultura nun ambiente afayadizu y solidariu. El programa amás inclúi actividaes qu'involucren a los neños na música y la cultura asturiana.

---

---

---