Alienda, La Maramoniz y Draque protagonicen los XII Alcuentros de Músiques Asturianes
AGORA
El ciclu d'actividaes, qu'entama la Oficina de Normalización Llingüística, va cuntar tamién con un alderique sobre'l relevu xeneracional y la presentación del llibru de Rodrigo Cuevas
28 may 2024 . Actualizado a las 14:02 h.La Oficina de Normalización Llingüística de Xixón sigue convocando actividaes nel so 20 aniversariu y, nesti casu, ayeri dio anuncia de la programación de los Alcuentros de Músiques Asturianes, un ciclu d'actividaes alrodiu de la música n'asturianu que cumple yá doce ediciones. Los eventos van desenvolvese dende'l 4 de xunu hasta'l 21 del mesmu mes, poniendo'l ramu con un conciertu coincidiendo col Día Européu de la Música.
La edición d'esti añu va empecipiar el martes 4 de xunu cola presentación del llibru La Xorda. Nuevos cantares de chigre na que van intervenir l’autor Rodrigo Cuevas, l’editor Xaime Martínez y la escritora xixonesa Pilar Sánchez Vicente. Va ser nel Patiu del Centru de Cultura Antiguu Institutu a les 19:30 hores y p'asistir ye necesario acutar, de baldre, una entrada na páxina web a partir del 3 de xunu. Al día siguiente, el mesmu espaciu va acoyer la primer amuesa musical, con un conciertu de La Maramoniz, el proyectu de Mapi Quintana inspiráu nos cantares que deprendió de so güela y qu’entemez con improvisación, jazz y otros sones de vanguardia.
A la semana siguiente, los Alcuentros van treslladase al Muséu Casa Natal de Xovellanos, onde'l grupu mozu Draque, tríu folk de cámara formáu por Celia Nieto, Julio Rodríguez y Celia Corrales, va ufiertar un conciertu a les 19:30 hores del martes 11. Un conciertu que fai d'enllaz col alderique El relevu xeneracional na música tradicional asturiana que se celebra el xueves 13 nel patiu del CCAI a les 19 hores. Ehí van participar Celia Corrales, Rodrigo Joglar, y Santi Galguera. L'actu modéralu Xicu Ariza, responsable de Musicasturiana.com.
La tarde del vienres 14 de xunu en Xixón va ser pa la danza. Pandereteros d'anguaño y 6 Riales van ser los protagonistes de la tarde en danza que se va facer nel Patiu de la CCAI dende les 20 hores. Pa poner el ramu a los alcuentros, el grupu Alienda va tocar nel Solarón el 21 de xunu a les 19 hores nun conciertu col que’l Conceyu festexa’l Día Européu de la Música.