La reconstrucción de la cadarma d'un neñu neandertal protagoniza la esposición «Los trece d'El Sidrón»
AGORA
L'amuesa va ser inaugurada cola presencia de los sos coordinadores, los investigadores Marco de la Rasilla, de la Universidá d'Uviéu, y Antonio Rosas, del Muséu Nacional de Ciencies Naturales
16 may 2024 . Actualizado a las 12:38 h.La reconstrucción de la cadarma d'un neñu neandertal protagoniza una amplia esposición sobro esta especie humana extinta que se va inaugurar en L'Infiestu el próximu 21 de mayu y qu'ufierta un percorríu pela meyor colección de fósiles neandertales alcontrada na Península Ibérica, procedente de la Cueva d'El Sidrón, n'Asturies.
L'amuesa, titulada «Los trece d'El Sidrón» y asitiada nel Edificiu de la Obra Pía de Infiesto (Piloña), va ser inaugurada cola presencia de los sos coordinadores, los investigadores Marco de la Rasilla, de la Universidá d'Uviéu, y Antonio Rosas, del Muséu Nacional de Ciencies Naturales (CSIC), que van esplicar los detalles de la nueva esposición y van ufiertar una puesta al día de les investigaciones en marcha llevaes a cabu pol equipu investigador. Va asistir tamién, en representación de la Universidá d'Uviéu, la so vicerrectora d'Investigación, Irene Díaz.
La esposición enmárcase nel desenvolvimientu del Protocolu Xeneral d'Actuación destináu a la protección, investigación y divulgación del patrimoniu cultural y científicu xeneráu polos estudios de los restos humanu y arqueolóxicu neandertales apaecíos na Cueva d'El Sidrón. «L'amuesa ufierta distintes novedaes físiques y audiovisuales destinaes a una meyor difusión ya internacionalización d'esta escepcional colección de fósiles neandertales», esplica Rosas.
Una de les protagonistes de la esposición ye la reconstrucción de la cadarma d'un neñu neandertal de 7 años y una estatura de 111 cm recuperada nes escavaciones d'El Sidrón, que s'esibe per primer vegada. «Trátase de la cadarma meyor representada d'esti yacimientu y unu de los más completos del mundu», apunta Roses.
L'estudiu de les sos pautes de crecimientu publicóse na prestixosa revista Science y anguaño investíguense aspectos concretos de la so maduración ósea. La reconstrucción de la cadarma del xuvenil 1 inclúi 120 pieces que tomen bona parte de los güesos de la cabeza, el tórax y les estremidaes. Amuésase tamién como novedá un molde endocranial (reconstrucción del celebru) con una capacidá cranial envalorada de 1330 cm3.
«Xunto cola cadarma del Xuvenil 1, esíbense les fieles reproducciones de 9 nuevos fósiles d'esti yacimientu, incluyíos la cara parcial (maxilar y quexada) del Adultu 2 (varón), la quexada del Adultu 3 (muyer), la conxunción de pelvis y fémur d'un adultu masculín, mesmo qu'otres pieces de la cadarma poscranial», numbera De la Rasilla.