En 2017, de forma voluntaria, seis escueles impartieron n'asturianu una de les dos sesiones selmanales de Ciencies Naturales, Ciencies Sociales, Educación Artística o Educación Física
15 ene 2024 . Actualizado a las 17:03 h.El presidente de l'Academia de la Llingua, Xosé Antón González Riaño, reclamó esti llunes nun alcuentru cola conseyera d'Educación, Lydia Espina, que'l Principáu recupere'l plan pilotu d'usu del asturianu.
El Plan Pilotu púnxose en marcha, de forma voluntaria, en setiembre de 2017 en seis escueles qu'impartieron en llingua asturiana una de les dos sesiones selmanales de Ciencies Naturales, Ciencies Sociales, Educación Artística o Educación Física.
Yera presidente Javier Fernández y conseyeru Genaro Alonso y na esperiencia participaron 105 alumnos. Educación realizó una evaluación del grau de satisfacción de families y centros, que mostró que más del 90% de les families participantes valoraben la iniciativa.
La Conseyería anunció qu'a partir del cursu 2018/2019 diba llevar el plan a otros diez centros y que'l Plan diba implementase pa que los alumnos qu'empezaren en Primaria pudieren siguir con él en Secundaria. Sícasí, cola llexislatura nueva, el plan quedó pa prau y la conseyera, Lydia Espina, refugó retomalu pola falta de seguridá xurídica al nun ser l'asturianu llingua oficial.
L'ALLA yá treslladó al presidente del Principáu, Adrián Barbón, y la viceconseyera de Cultura, Política Llingüística y Deporte, Vanessa Gutiérrez, la necesidá de recuperar esta esperiencia d'usu vehícular del asturianu y esti llunes, nun alcuentru ente Riaño y Espina, nel que participó tamién el director xeneral d'Ordenación Académica, David Artime, la institución llingüística insistió nesta propuesta.
Asina, el presidente de l'ALLA apurrió a Educación les propuestes académiques sobre l'anunciáu 'Plan de Normalización de la Llingua Asturiana' a llevar alantre pol Principáu nesta llexislatura. Nesti sentíu, l'ALLA plantea la reconocencia de la especialidá docente pal profesoráu, el siguimientu de la escolarización del asturianu y les posibilidaes pa la so optimización, la recuperación d'esperiencies d'usu vehicular del asturianu o la necesidá de cuntar con materiales curriculares afayaos a la LOMLOE y al Decretu del Currículu d'Asturies.
Nel alcuentru tamién afondaron en cuestiones como la proyección de la cultura y la llingua asturiana nes escuelines de 0-3 dende'l puntu de vista de les necesidaes formatives del profesoráu y de la ellaboración de materiales curriculares; la necesidá, pedagóxica y educativa, de cuntar con espacios infantiles na programación de la RTPA o la meyora de la estructura organizativa de la Conseyería p'algamar una presencia escolar de la llingua más afayada a les espectatives sociales.
«La reunión, fecha nun clima de cordialidá y enfotu compartíu, tuvo un altu grau d'alcuerdu nos estremaos aspectos consideraos. Dambes partes quedaron en volver a aconceyar a lo llargo del presente cursu pa valorar la puesta en práctica de les midíes consideraes», indicaron dende l'ALLA al traviés de nota de prensa; informó Europa Press.