Vox, en refugando'l Supremu la so petición de paralizar la investidura: «Les ferramientes nun s'escosen equí»

Vox restó importancia al refugu del Tribunal Supremu (TS) del so pidimientu de paralizar el debate d'investidura de Pedro Sánchez, asegurando que «les ferramientes» pa frenar lo que la formación ve como «un golpe d'Estáu» nun «s'escosen equí». Asina, garantizó que van siguir empleando «toles que tean na so mano», n'instituciones, xulgaos y na cai.

Asina lo fixo la portavoz de Vox nel Congresu, Pepa Rodríguez de Millán, en conociendo la decisión del Altu Tribunal. Vox solicitara como midida cautelar la paralización del debate mentes el TS estudia si almite a trámite la querella que presentaron los de Santiago Abascal contra Sánchez, l'expresidente catalán Carles Puigdemont, el PSOE y Junts pola supuesta comisión de los delitos de robu, encubrimientu o collaboración del terrorismu, usurpación de funciones del Poder Xudicial y negociaciones prohibíes a funcionarios públicos, nel marcu de les negociaciones pa la investidura.

«Lo que se refugó ye la midida cautelar, la querella sigue alantre», puntualizó Rodríguez de Millán en declaraciones a RTVE, recoyíes por Europa Press. «Con too, vamos emplear toes y cauna de les ferramientes que tean na nuestra mano, vamos facer too y más con tal d'aparar esti golpe d'Estáu y esti pergrave ataque a la nuestra democracia y a la igualdá de tolos españoles», añadió.

Nesti contestu, recordó que Vox yá presentó otra querella contra Sánchez y que la formación piensa presentar delles contra los miembros de les meses del Congresu y del Senáu si almiten a trámite la llei d'amnistía, negociada ente PSOE y Junts p'asegurar los votos del partíu independentista al candidatu socialista na so sesión de investidura. La midida de gracia va beneficiar a los implicaos nel 'procés' dende 2012.

---

---