Correos emite un sellu conmemorativo con motivu del 18 aniversariu de la Princesa d'Asturies

Correos emitió un sellu conmemorativu con motivu del 18 aniversariu de la Princesa d'Asturies, Leonor de Borbón y Ortiz, dientro la serie «Efemérides». Con una tirada de 124.000 exemplares y un preciu de trés euros la unidá, el diseñu amuesa una semeya de la princesa sobre un fondu en foil plata, que dota a la emisión d'un calter modernu y solemne en tan importante fecha.

La Princesa d'Asturies xura esti martes la Constitución, nel día nel qu'algama la mayoría d'edá, fíxose nuna sesión plenaria de Congresu y Senáu, actu protocolariu énte les cortes previstu na Constitución, y un finxu hestóricu del qu'una vegada más la filatelia va dar fiel testimoniu. Y ye que los sellos, amás de ser un mediu de franquéu, son «un escelente soporte a la de tresmitir la hestoria, la cultura y los valores d'un país, gracies al so llinguaxe universal y comprensible en cualesquier parte del mundu» detallen dende Correos.

Esta nun ye la primer vegada que la imaxe de la futura monarca d'España apaez nos sellos. En payares 2015, con tan solo 9 años, y por cuenta de la primer edición de los Premios Princesa d'Asturies, qu'hasta l'añu anterior y mientres casi 35 años fueron apurríos embaxo la denominación Premiu Príncipe d'Asturies, púnxose en circulación una tirada de 310.000 estampines dientro de la emisión Grandes Premios».

Estos sellos, con valor d'un euru y un tamañu de 40,9 x 28,8 milímetros, llevaben impresa la semeya de la Princesa sobre un fondu ilustráu cola imaxe del Teatru Campoamor d'Uviéu, llugar onde se celebra añalmente la entrega d'estos gallardones, y l'escudu de la Fundación Princesa d'Asturies, organizadora de los premios.

El sellu que s'emite güei pue mercase nes oficines de Correos, al traviés de Correos Market, contactando col Serviciu Filatélicu nel corréu atcliente.filateliacorreos.com, o llamando al 915 197 197.

---

---