Diego García, cocineru: «N'una sidrería siempre tendríen qu'escanciar, ye algo primordial»

Diego García (1979, Llangréu) ye'l cocineru d'El Pintu, en La Pola Llaviana. Gran conocedor del sector gastronómicu n'Asturies, García esplica los sos entamos na cocina, los sos proyectos de futuru y los pasos que lu llevaron hasta'l proyectu nel que s'atopa somorguiáu.

—¿Cómo se definiría como cocineru?

—Como cocineru definiríame como honestu col oficiu, sacrificáu, trabayador y defensor del entornu y la nuesa despensa.

—¿Cuálos fueron los pasos que lu llevaron hasta la cocina d'El Pintu?

—La mio idea siempre foi acabar en Llaviana con un sitiu pequeñín y onde se diere de comer curioso. Estudié en Xixón y llueu de les práctiques en Fagara en Llaviana fui pa Uviéu a la Corrada del Obispu onde tuvi 10 años y me forme como cocineru y tamién como persona, llueu tuvi'n Xixón nel Requexu 3 años xusto antes de volver pal mio pueblu.

—¿D'ónde naz la so pasión pola cocina?

—La pasión pola cocina vienme por mio güela Maria Luisa, yera una escelente cocinera y yo taba tol día al rau d'ella y asina foi creciendo'l mio interés pola cocina.

—¿Qué opinión-y merez el nivel gastronómicu mediu de les sidreríes n'Asturies?

—Como en to hai sidreríes per bones y otres que dexen munchu que desear, pero creo que ca vez se ta poniendo mas en valor la sidra. Tamién creo que n'una sidrería siempre tendríen qu'escanciar la sidra, ye algo primordial.

—¿Qué ye lo que más gusta al veceru d'un menú del día?

—Nel menú del día la xente sigue prefiriendo la cuyar, los guisos, moyar pan, lo mesmo da que sía branu la cuyar furrula tol añu.

—Nuna zona como Llaviana, ¿cómo afecta a un negociu reseñar en redes sociales?

—Como en tolos llaos les reseñes en redes sociales dan muncha visibilidá, ta mui al orde del día, sobre manera agora que la rexón ye mas turística casi qu'otra cosa.

—¿Tien referentes nel mundu de la cocina?

—Los mios referentes na cocina, gustame muncho la cocina francesa, soi un namorao de Paul Bocuse, llueu d'equí Hilario Arbelaitz que se retiró va mui poco parezme'l cocineru que meyor me dió de comer, y n'Asturies sin duda Pepe Ron, si a alguién me gustaría paeceme ye a él y non solo na manera cocinar paezme un xeniu.

—¿Gústa-y más comer o cocinar?

—Comer o cocinar, nun podría quedame con una cosa gustenme les 2 lo mesmo.

—¿Cuálos son los sos platos favoritos? Tantu pa comer como pa preparar.

—Lo que mas me gusta cocinar son los guisos, los cocíos, el cabritu pero tamién un bon pescao, prácticamente tolo que nun sía dulce. Platos favoritos, el rollu bonitu que facía mi güela y la sopa de mio ma.

—Nos sos entamos sufrió un cáncer de güesos nel cielu la boca. Tuvo qu'operase y finalmente recuperóse. ¿Afectólu de dalguna forma'l pasu d'esta enfermedá a nivel llaboral?

—La verdá que col cáncer tuvi muncha suerte, pillome con 22 años, garráronmelu mui a tiempu y aguante bien la quimio, al final foi un paréntesis d'un añu y pudi retomar la normalidá.

—¿Qué proyectos de futuru tien n'El Pintu?

—El proyectu nel Pintu ye siguir dando bien de xintar, que la xente marche contenta y con ganes de volver. Nun somos pretenciosos, nun necesitamos reconocimientos pa ser felices, nosotros con una pota, un fueu y bona materia prima nun necesitamos mas.

---

---

---