Mapi Quintana, artista asturiana: «Nun veo riesgu ni orixinalidá en facer música na llingua materna de caún»

L'artista Mapi Quintana (L.lena, 1980) torna nueve años dempués y failo con dos discos: Música pa tornar páxaros y La Maramoniz. La cantante fala sobre los dos álbumes -con un total de catorce temas de jazz y folk- y sobre'l so apueste pola creación de la música n'asturianu.

—Torna dempués de nueve años con dos discos «Música pa tornar páxaros» y «La Maramoniz». ¿Cómo foi'l procesu de creación?

—El procesu de creación foi por separao, son dos proyeutos distintos que cuenten dos hestories distintes. «La Maramoniz» fízose a lo llargo de 2021 y foi un trabayu más coleutivu xunto colos mis compañeros César Latorre, Juanjo Díaz y Sonia Cartón. «Música Pa Tornar Páxaros» fízose na primera mitá de 2022 y ye un trabayu personal.

 —¿Qué tenta tresmitir nestos dos trabayos?

—«La Maramoniz» ta fecha alrodiu de les mis alcordances con mio güela María, el so pueblu, l'ambiente na so cocina, los cantares que deprendí d'ella.... Música Pa Tornar Páxaros ye un repertoriu fechu pa nun escaecer la xente que yá nos falta, que nestos últimos cuatro años, foi mucha xente la que nos dexó.

—Foi a Ámsterdam a estudiar música y tomó la decisión de tornar a Asturies. ¿Cuálos fueron los motivos que te llevaron a volver al Principáu?

—Echaba de menos a mio familia, falar el mi idioma, el paisaxe de casa...

—¿Qué-y apurrió na so vuelta a Asturies esa esperiencia nel estranxeru?

—Volví con 9 años de aprender, conocer y trabayar con otres músiques y xente de otres cultures. Aprendí a da-y valor y a defender la mio propia cultura. Y volví con muchísimu apredizaxe técnicu pa poder facer meyor música de la que facía cuando marché.

—¿Qué opina de los músicos asturianos, como usté, qu'apuesta pola creación musical n'asturianu?

—Xunto col restu de la sociedá asturiana, somos los responsables de defender y curiar la nuesa cultura y l'asturianu ye'l troncu de la nuesa cultura. Nun me reconozo en decir que «yo apuesto pola creación musical n'asturianu». Ye la mio llingua materna y na que me sé espresar meyor. Toi segura que nun me faría la mesma pregunta si ficiera música en castellanu, y nun taría yo estrañá de la pregunta si ficiera música en finlandés, por exemplu. Nun veo riesgu ni orixinalidá en facer música na llingua materna de caún.

—¿D'ónde naz el so apueste pola música tradicional asturiana?

—El mio interés pola música tradicional y pola cultura asturiana en xeneral entama cuando viviendo n'Ámsterdam, tenía que desplicar a les mis compañeres y compañeros del conservatoriu qué yera Asturies: cómo yera’l paisaxe, el clima, la gastronomía, que la nuesa música nun ye’l flamenco y la tauromaquia (la cual repudio con too mi ser) nun ye parte de la nuesa cultura. Eso, añadío a que echaba de menos a mio familia, llevóme a querer facer música que me ficiera tar un pedacín más cerca de mio casa.

—¿Qué referentes tien y por qué?

—La gran referente y culpable de que yo sea cantante ye Ella Fitzgerald, pero hai tantísimos músicos y músiques de tantísima calidá y de músiques mui diferentes y interesantes, que poner equí cuatro o cinco nomes sería contestar a medies.

—¿Cree que los artistes asturianos cunten col sofitu abondu per parte de les instituciones autonómiques?

—Hai qu’entender d'una vez ya que la cultura ye una industria en sí, nun se pue negar, pero nesa industria vive un porcentaxe mui pequenu de persones que faen música profesionalmente. El sector cultura hai que velu más como una biblioteca, ye un serviciu que damos a la sociedá p’arriquecela, pa favorecer la creatividá tamién de quien escucha, p’apurrir material nel procesu que crear una sociedá con mente crítica.

Tán dándose pasos na direición acertada pa tener un sector artísticu más sólidu, pero tien que dir muncho más allá de los premios y les subvenciones. Fai falta un proyectu que mire a llargu plazu, fai falta revisar el sistema de contrataciones, fai falta tar colos artistes tamién cuando tán creando y non namás premiar el resultau. Hai compañeros y compañeres que ni siquiera puen pagar una cuota d’autónomos y asina difícilmente van poder crear nada. Fai falta añadir nueves titulaciones, grados de jazz y música moderna, pr exemplu. Mui importante tamién, formación en management y representación, hai que dir pasando páxina a la era de los representantes xateros.

---

---

---