Sánchez comprométese a «facer más» pa impulsar l'usu de llingües cooficiales nes instituciones de la Unión Europea
AGORA
El presidente del Gobiernu en funciones destacó qu'estes llingües tán reconocíes na Constitución como «lo que realmente son», un «activu enorme de la nuestra sociedá»
16 ago 2023 . Actualizado a las 17:00 h.El presidente del Gobiernu en funciones, Pedro Sánchez, comprometióse a «facer más» pa impulsar l'usu de les llingües cooficiales y garantizó qu'asina lo va facer mentes la Presidencia española de la Unión Europea pa fomentar el so usu nes instituciones comunitaries.
Asina lo aseguró nel Congresu na so primer intervención énte los diputaos y senadores socialistes escoyíos el 23 de xunetu, un anunciu qu'él mesmu enmarcó nel debate que surdió nes últimes selmanes al volver pidir les fuercies nacionalistes y independentistes que s'amplíe l'usu de les llingües cooficiales na Cámara Baxa.
Sánchez destacó qu'estes llingües tán reconocíes na Constitución como «lo que realmente son», un «activu enorme de la nuestra sociedá». «España fala en castellanu, pero España tamién fala en catalán, en euskera y en gallegu y, por eso, el nuestru deber ye consolidar espacios de representación, d'usu y de conocimientu de les llingües d'España», sentenció.
El presidente reivindicó los avances que se fixeron nesta materia nel so mandatu por exemplu, dixo, al traviés del Institutu Cervantes, pero reconoció qu'hai que siguir trabayando nesa llinia. «Tenemos que facer más, podemos facer más, y vamos facer más. La promoción de les llingües cooficiales tien que ser xera de toles instituciones, tamién del Poder Executivu, y por eso quiero facer l'anunciu de que vamos impulsar el so usu nes instituciones comunitaries como un compromisu que voi esplegar a lo llargo de la Presidencia española de la Unión Europea», indicó.
Nesti puntu, el líder del PSOE aprovechó pa destacar que «nun hai propósitu más noble en política que construyir convivencia» pa «superar con ello conflictos qu'esgañaron» a la sociedá nel pasáu y llamó a «tar más xuníos na nuestra diversidá», informa Europa Press.
Al anunciu yá respondió ún de los diputaos de Bildu, Ion Iñarritu, qu'apelló a Sánchez a empezar meyor poles instituciones españoles como'l Congresu: «Va empezar poles de la so casa, ¿non?», preguntóse na rede social enantes conocida como Twitter.