La Fabriquina prepara la segunda edición de «Nunca vencida», l'ensayu de David Guardado sobre la idea d'Asturies
AGORA
L'académicu de la llingua analiza dende una perspectiva inédita cómo s'interpretaron símbolos y fechos históricos
10 ago 2023 . Actualizado a las 16:57 h.La editorial La Fabriquina yá tien n'imprenta la segunda edición de «Nunca vencida. Una historia d'Asturies», l'ensayu de David Gaurdado onde fai un repasu a les idees, mitos y discursos sobre Asturies a lo llargo de la historia.
Dende l'Asturies cuna d'España a la tierra revolucionaria, al traviés de les páxines de «Nunca vencida», l'académicu de la llingua analiza dende una perspectiva inédita cómo s'interpretaron símbolos y fechos históricos, dende los ástures, a Pelayo y Cuadonga, pasando pela revolución de 1808, la bandera, la llingua o la Revolución d'Ochobre.
Fechos que, según indiquen dende la editorial, formen parte d'una «batalla na que l'autor estrema dos xenealoxíes ideolóxiques opuestes». Asina, «una mira al futuru y básase na afirmación de la singularidá asturiana, mentes que la otra mira al pasáu y constrúise dende la renuncia y la señaldá», informa Europa Press.
David Guardado Diez (Xixón, 1970) ye llicenciáu en Filoloxía Inglesa, diplomáu n'Estudios Avanzaos en Filoloxía y Especialista Universitariu en Llingua Asturiana. Miembru de númberu de l'Academia de la Llingua Asturiana, foi ioneru na presencia d'esti idioma n'internet. Amás, ye autor de dellos artículos y del ensayu «Llingua estándar y normalización llingüística».