Álvaro Morais: «Estos ataques escontra la llingua asturiana valen pa xuntanos a tolos que tamos a favor»

Una serie de vídeos inocentes pa esplicar cómo son los pasos básicos de bailles tradicionales asturianos y tocar la pandereta sirvieron d'escusa para una campaña d'acoso contra'l so autor, Álvaro Morais Bernardo, dempués de ser señaláu pola Plataforma contra la cooficialidá del asturianu.

Pero el mozu terminó recibiendo miles de comentarios de sofitos y el vídeu con un enorme númberu de visites.

-¿Cómo vivíste la polémica tres l'ataque en redes sociales a los vídeos de «viva'l baille»?

-Nun m'esperaba pa nada que foran a metese con un por facer el programa de «Viva'l baille». De primeres sentíme un pocoñín amedrentau, quiciabes porque foi la primer vez que m'atacaren directamente a min poles redes, pero ensiguida me conciencié de que valía más nun s'amedrentar y nun caer na trampa qu'ellos me taben poniendo.

-Tamién hubo munches reacciones de solidaridá inclusive dende fora d'Asturies, ¿Esperábeslo?

-Non, la verdá que nun m'esperaba tanta solidaridá conmigo. Les muestres de ciñu, respetu y solidaridá foron muncho mayores que los comentarios ausentes de respetu. Toi mui agradecíu de tola xente que se manifestó en redes o personalmente pa dame ánimos y ciñu, non solo desde dientro d'Asturies si non tamién dende fuera d'Asturies, con mensaxes desde Cartagena, Catalunya, Galiza, Granada, Valencia, Murcia o Andalucía pasando poles personalidaes d'Adrián Barbón o Rodrigo Cuevas. Nun m'esperaba qu'un videu de «Viva'l baille' pudiere tener tanta repercusión y sofitu fuera y dientro d'Asturies.

-¿Cómo surde la idea de los vídeos de «viva'l baille»?

-Llevaba tiempu cola idea de facer un programa en PlayPresta, pero por falta de tiempu nun me punxere a ello primero. Amás, a pesar del mio interés n'ello, nun tenía mui claro sobre qué lu diba facer hasta qu'un día m'ofrecen facer un dando clases de baille y pandereta. La idea foi xenial.

-¿Tienes otros proyectos paecíos en mente pa'l futuru?

-Pel momentu nun tengo nengun proyectu en mente, anque diré faciendo otres coses a la par que vayan surdiendo.

-¿Crees que l'asturianu, la defensa de la llingua asturiana, vive un momentu especialmente difícil, de señalamientu en redes o l'ámbitu políticu?

-Anguaño paez que ta creciendo el movimientu escontra la llingua asturiana, pero son bastantes menos que tola xente que fala n'asturianu, consume cultura n'asturianu o que tán a favor de la oficialidá pa les llingües d'Asturies. Yo creo qu'estos ataques escontra la llingua asturiana valen pa xuntanos a tolos que tamos a favor, a lluchar polos nuestros derechos y mediante l'apoyu mutuu vamos siguir faciéndolo.

---

---