N'A Caridá sigue'l cursu de capacitación docente n'eonaviegu y, mentanto, en Casu, tamién sigue'l cursu avanzáu de llingua asturiana
07 ago 2023 . Actualizado a las 14:05 h.Depués de la primer selmana d’actividá de la Universidá Asturiana de Branu (UABRA) n’El Campu (Casu) y A Caridá (El Franco), los cursos entren nos últimos díes de docencia. N’A Caridá sigue’l cursu de capacitación docente n’eonaviegu y, mentanto, en Casu, tamién sigue’l cursu avanzáu de llingua asturiana, xunto a otros dos selmanales, qu’escomiencen güei llunes: «50 años en movimientu: ámbitos y espacios de desendolcu, normalización y vindicación de la llingua asturiana na historia recién» y «Recoyida y recuperación de la tradición oral y musical».
N’El Campu, les actividaes abiertes al públicu vuelven mañana martes, a les siete y cuartu, cola conferencia de Blanca Fernández Quintana, escritora, que falará de «Lliteratura de xéneru n’asturianu: un nuevu camín d’anovamientu» nel centru d’interpretación del Parque de Redes. El miércoles, dende les diez y cuartu de la nueche, la plaza d’El Campu va acoyer una «Nueche en danza», con un taller pal baille tradicional.
Rematando la selmana, el xueves a les siete y cuartu, tamién nel centru d’interpretación del Parque de Redes, el cineasta casín Samuel Fernandi va presentar dos de los sos trabayos cinematográficos nel contestu de la conferencia «Patrimoniu inmaterial: fonte pa la creación d'ún imaxinariu audiovisual asturianu».
Pel so llau, n’As Quintas d’A Caridá, el miércoles dende les seis de la tarde va desenvolvese la conferencia de la normalizadora llingüística Ángela Ferreira: «Funcióis da Oficina Cultural y Llingüística da Fundación Parque Histórico del Navia». Zarrando la programación d’actividaes abiertes n’El Franco, el xueves a les diez y media de la mañana, la biblioteca d’As Quintas va acoyer el taller «Xunta de mitos. El mundo máxico d’Asturias núa historia cuntada con marionetas».