Esti añu eleutoral viose una amuesa del emplegu de la llingua asturiana polos partíos que se presentaben a les eleiciones municipales, autonómiques y estatales.
Onde más se vio l’idioma nos cartelos, foi nes dos primeres convocatories nos partíos de la esquierda, sobremanera na tradicional y nacionalistes (magar ún nun se presentaba). Hebo dalgún cartelu n’asturianu del partíu nel gobiernu. Nes llocales y autonómiques respetaben la toponimia dos de los que salieren.
Na convocatoria estatal presentóse la cartelería nel bloque d’esquierdes, de mou billingüe. Y namái n’asturianu nel llema de campaña nos actos públicos nel país. Toponimia billingüe p’anunciar los mítinos del partíu mayoritariu nel gobiernu.
No que cinca a los discursos, sofitaron la oficialidá: el citáu bloque y el partíu de centruesquierda.
Frente a ellos, la drecha refugóla y la estrema drecha llegó inclusive al ataque direutu al asturianu ellí onde teníen poder conceyil, xenerando una fola de protestes ente la población y los seutores afeutaos, como’l de la de los artistes que faen música n’asturianu.
La comunidá llingüística asturiana careció la ofiensa de los prexuicios político-llingüísticos hasta l’estremu de l’aición a la escontra de la estrema drecha basándose nos falsos tópicos de dómines que yá creyíemos superaes polos tiempos. Como la non igualdá ente les llingües estatal o “rexonales”, la creyencia na falta de xunidá de la llingua minorizada, la supuesta complexidá escesiva pa un Estáu que quien monollingüe, l’estatus internacional de la mayoritaria y la oficialidá única d’esta como llei inamovible.
La bayura’l plurillingüismu, el respetu a les identidaes de les comunidaes minoritaries, l’espoxigue de los calces democráticos per aciu les polítiques de normalización social de les llingües minoritaries, son sofitaes pola gran mayoría la población en toles encuestes feches.
Queden les eleiciones europees del mes de mayu del añu que vien, de les que mui poco se pue esperar, si mos fixamos nel tratu recibíu poles llingües cooficiales del Estáu español. Ye un «asuntu internu» pa Europa.
Magar los esfuercios d’una asociación por esparder la conocencia de la situación asturiana ente dalgún eurodiputáu del país col envís de da-y visibilidá internacional. Deseyar nesi sen, que tenga bona suerte la xera internacional entamada dende Iniciativa pol Asturianu.