«Música n'asturianu SÍ» ve una desautorización a Vox nel consensu sobre la programación n'asturianu

El sector cultural asturianu, sumáu al traviés de la iniciativa «Música n'asturianu SÍ», manifestó'l so contentu sobre'l consensu alcanzáu esti martes nel Plenu sobre la iniciativa en defensa a la programación n'asturianu, al sumar a los grupos d'esquierda firmantes de la proposición plenaria, los votos de Foru y PP, que se desmarcaron asina del so sociu de Gobiernu, Vox, l'únicu que votó en contra.

Asina, vieron nos votos de Foru y PP una desautorización a la conceyala de Festexos, Sara Álvarez Rouco (Vox), que en delles declaraciones anteriores señalara que nun diba programar artistes n'asturianu que defendieren nos sos espectáculos o conciertos la oficialidá del asturianu.

Por eso, destacaron que Vox consiguió l'efectu contrariu, porque'l testu aprobáu implica un compromisu de programar na ciudá más actividaes de cultura n'asturianu. «Yá valió de qu'a los asturianos y asturianes nos intenten facer de menos», señalaron al traviés d'una nota de prensa.

Remarcaron, amás, que van tar vixilantes énte'l cumplimientu del alcuerdu plenariu y van faer siguimientu de la programación de festexos, na que, según ellos, «nun pue tener sitiu la censura, nin los complexos nin los prexuicios llingüísticos», informa Europa Press. Amás, pidieron a l'alcaldesa xixonesa, Carmen Moriyón (Foru), que-yos garantice y demuestre que va ser asina.

---

---