Iván Llera, presidente d'Iniciativa pol Asturianu: «Tenemos que ser quien a garrar el tren de les nueves tecnoloxíes»

Iván Llera, presidente d'Iniciativa pol Asturianu, repasa l'actualidá del colectivu y analiza'l momentu que vive l'idioma.

-Iniciativa pol asturianu ye una asociación con más d'una década de trayectoria y asitiada na rexón. Pa quien tovía nun la conoza, ¿cómo la definiría? 

-Ye un garrapiellu de xente esmolecío pola llingua que sentimos tola vida en casa. Munchos crecimos sintiendo qu’en casa falábemos mal. Magar tol trabayu d’estos años, tovía falta muncha pedagoxía y valtar estereotipos bien enraigonaos na sociedá. Por eso faen falta polítiques de normalización y defender los derechos de quien queremos vivir n’asturianu. Creo qu’Iniciativa pol Asturianu ye importante amás porque nació nun momentu de desánimu del movimientu de reivindicación llingüística. Echar a andar l’asociación contribuyó a camudar esa situación. Esi ye ún de los ésitos nesti tiempu, nel que consiguimos avances, por pequeños que fueran. Y que cambiara la percepción del movimientu ente la xente qu’ensin ser roceano a la cuestión, víala dende fuera. Quiero aprovechar pa dar gracias a tolos socios y socies que lo ficieron posible nestos años. Nun recibimos nenguna sovención nin ayuda pública, ellos son quien permiten qu’Iniciativa pol Asturianu siga furrulando casi doce años depués.

-Usté ye'l so presidente. ¿Cómo ta organizada l'asociación? ¿Cuántos socios son? 

-Tenemos una xunta directiva formada por 15 persones con distintos perfiles y de la que me presta destacar dos coses especialmente: una presencia mui importante de xente mozo y que ye totalmente paritaria. Son dos cuestiones que nos paecíen fundamentales cuando ficimos la última xunta xeneral. Y hai bona base. Anguaño somos unos 600 socios y socies. 

-¿Cuáles son les principales actividaes qu'entamen? 

-Intentamos llegar a tolos ámbitos posibles nel mayor númberu de conceyos posible. Hai una parte fundamental de trabayu que tien que ver cola rellación colos partíos políticos a nivel municipal y autonómicu. Pero hai muncho mas. Tamos na cai pa facer propuestes y llograr coses tan cencielles como que la megafonía de la playa San Llorienzo de Xixón suene n’asturianu. Tamién nos presta caltener llazos. Tenemos perbona relación colos Centros Asturianos. En Madrid echemos una mano pa recuperar el Día de les Lletres. Y como tolos años, esti branu volvemos a la Feria de Muestres, onde cuntamos con un stand propiu nel qu’amosamos qu’hai una montonera d’empreses que creen riqueza valiéndose del asturianu y onde entamamos el Día de la Llingua Asturiana. Queremos llegar al mayor númberu de persones posibles siempres faciendo un trabayu en positivu felicitando a quien fai un usu normal del idioma. 

-Tán faciendo una ronda pelos conceyos pa plantegar propuestes en defensa y promoción del asturianu. ¿Qué importancia tienen estes iniciatives? 

-Ye fundamental. En cuantes qu’echaron a andar los gobiernos nuevos entendíemos que yera’l momentu de facer propuestes pal mandatu. Entamemos en Xixón con grupos de la oposición y col conceyal de Normalización Llingüística d’Avilés. Nes próximes selmanes siguiremos con otros conceyos como Llangréu, Mieres y Carreño. Tamién vamos solicitar un alcuentru cola alcaldesa de Xixón, Carmen Moriyón, pa tresllada-y la nuestra preocupación pol situación del asturianu nel Conceyu. Nun vamos aceptar pasos atrás. 

-La llexislatura pasada foi'l momentu nel que más cerca tuvo la oficialidá. ¿Qué falló? 

-Nun dieron los númberos. Magar qu’habia 27 diputaos dispuestos a sentase a falar y negociar una reforma del Estatutu qu’incluyera la oficialidá, lo cierto ye que nun hubo capacidá p’algamar esi alcuerdu porque s’entemeció’l reconocimientu de los derechos llingüísticos con otres cuestiones ayenes, pero nun paga la pena enredase en repartir culpes. Hai que mirar al futuru. 

-¿Cree qu'hai marxe pa consiguila a curtiu plazu? 

-Si por curtiu plazu entendemos esta llexislatura, nun paez probable, pero tamos en camín. Si hai diez años nos dicen que diba haber cuatro partíos políticos y 24 diputaos na Xunta Xeneral defendendo la oficialidá de les llingües d’Asturies costaríanos creelo. Toca siguir trabayando a lo llargo d’esta llexislatura desenvolviendo polítiques de normalización y faciendo pedagoxía pa enanchar esi sofitu que ye una realidá na cai. Prestaríame volver a ver al PP defendendo la oficialidá. 

-¿Por qué motivos tendría de ser oficial? 

-Tenemos la obligación de curiar y protexer el nuestru patrimoniu y dexar esi heriedu a les nueves xeneraciones. Igual que nun dexamos cayer el prerrománicu nun podemos dexar morrer l’asturianu. La llingua fala de nós, de la nuestra historia y idiosincrasia. Ensin raigaños nun hai futuru.

-Al marxe de la oficialidá, la llei d'usu permite avanzar na promoción del idioma. ¿Qué tipu de midíes considera que tienen de tomase de manera inmediata?

-Lo primero ye ellaborar un Plan de Normalización que recueya les midíes a desendolver a lo llargo de mandatu. Tien de ser la guía que marque’l camín a percorrer nos vinientes años y permitir a organizaciones como la nuestra facer siguimientu del trabayu fechu. Tampoco podemos escaecenos de la especialidá docente. Son demasiaos años. La situación del profesoráu de Llingua Asturiana y Eonaviego ye insostenible. Otramanera, tenemos que ser quien a garrar el tren de les nueves tecnoloxíes. Y depués tan los medios públicos de comunicación. Tres minutos de noticies n’asturianu na RTPA ye claramente insuficiente.

---

---