Les grandes cifres de la CometCon 2023: más de 24.000 asistentes, 160 puestos y 450 nueches de tol mundu
AGORA
L'eventu va perfacer una pequeña ciudá de la cultura, l'anovación y l'ociu que va contribuyir a allargar el branu xixonés
21 jul 2023 . Actualizado a las 13:05 h.CometCon, la gran cita d'ociu alternativu del norte d'España, va echar a andar nunes selmanes en Xixón. Una cita pa los amantes del ociu alternativu que va contribuyir a allargar el branu asturianu. Del 1 al 3 de setiembre, el recintu ferial Luis Adaro de Xixón, va axuntar a más de 24.000 asistentes pa descubrir les últimes novedaes rellacionaes col mundu de los videoxuegos, el manga, l'artesanía o'l cosplay.
Un eventu que, na so undécima edición, espera superar toles sos cifres xenerando asina un impactu económicu y social significativu na ciudá y na comunidá. Un total de 160 puestos ente tiendes, artesanos, empreses d'impresión 3D, drones y esgrima, van enllenar les distintes sales de los pabellones onde se va desenvolver la CometCon.
A estos puestos van sumase los distintos espacios dedicaos a los eSports, videoxuegos y esposiciones. Los distintos puestos, veníos de toles partes del mundu, y incluyida la organización, van xenerar unes 450 nueches en Xixón en distintos tipos d'agospios.
«Too esto xenera un ecosistema propiu, creando mientres trés díes una pequeña ciudá de la cultura, anovación y l'ociu que pon a Xixón nel mapa. Falamos d'un retornu económicu que multiplica por 3 o 4 la inversión de cometcon pa la ciudá. Gracies a les feches estratéxiques, llogramos allargar el branu xixonés a setiembre xusto primero qu'empiece'l cursu escolar. CometCon ye la última fiesta del branu pa miles de mozos», asegura Héctor Lasheras, organizador del eventu.
La collaboración privada y público-privada ye seña d'identidá de la CometCon. Diseñar y construyir un eventu d'estes característiques requier d'un bon númberu d'empreses implicaes. Magar dellos proveedores que trabayen nel eventu son de fuera del Principáu, los más cercanos son empreses llocales de cartelería, producción, montaxe, catering y personal nuevo asturianu, coles mires d'atrayer y retener la riqueza económica y el talentu nuevo n'Asturies.
«Yá nun se fala solo d'un eventu p'Asturies, sinón dende Asturies, va años que tenemos ente un 20 y un 30% d'asistentes de fuera d'Asturies, proviniente de les comunidaes cercanes y les grandes capitales que vienen atrayíos polos torneos, concursos y polo xeneral el bon ambiente que se crea, somos un puntu d'alcuentru que materializa amistaes virtuales nel sieglu XXI», apunta Lasheras. Les entraes, que yá tán a la venta, van poder adquirise dixitalmente en www.cometcon.org o bien na mesma taquilla del eventu.