La muestra va tar abierta hasta'l 24 de setiembre nel Muséu Arqueolóxicu d'Asturies
08 jul 2023 . Actualizado a las 05:00 h.El Muséu Arqueolóxicu d'Asturies acaba d'inaugurar la esposición: «¡Venga a conocer Asturies! Guíes y cartelos turísticos na colección del Muséu del Pueblu d’Asturies, 1899-1987», entamada pol Muséu Arqueolóxicu d'Asturies y el Muséu del Pueblu d’Asturies. La esposición va tar abierta hasta'l 24 de setiembre.
Tolos materiales que s'esponen fueron adquiríos nos últimos trenta años pol Muséu del Pueblu d’Asturies col fin de conocer y caltener la imaxe que s'ufiertó d'Asturies nel sieglu XX. Esta muestra ye continuación de la esposición «Asturies, guapura categórica. Cartelos pal turismu del Muséu del Pueblu d’Asturies», entamada nel Muséu Nicanor Piñole (Xixón) en 2020.
Na esposición espónense materiales nuevos: guíes, folletos y banderinos de promoción turística, como cartelos adquiríos apocayá pol Muséu del Pueblu d’Asturies ente los que destaquen los realizaos pol ilustrador catalán Morell (1899-1949) pa la Dirección Xeneral de Turismu en 1941, que ye un cartelu d'una gran calidá y del qu'hasta agora nun esistía nengún nuna colección pública asturiana, y el dedicáu a Asturies na serie de la campaña estatal «España en Paz», editáu en 1964.
Dende finales del sieglu XIX, Asturies incorpórase al fomentu del turismu per aciu de la publicación de guíes y cartelos de propaganda. La imaxe del país que se trataba de promover yera esencialmente la mesma que llegó a anguaño. Vendíase un paisaxe con montes verdes, mar y pueblos rurales, onde l'horru conviértese nun iconu; tamién la hestoria, con Cuadonga y l'arte asturianu como reclamos mayores pa visitar Asturies. L'eslogan que s'acuñó p'atraer a los primeros turistes foi «Asturies, la Suiza española» y foi Pérez Pimentel, nos años venti, quien llanzó'l «Asturies, paraísu del turista». A día de güei, el turismu ye ún de los sectores económicos más importantes del país.
Nesta esposición amuésense dieciocho cartelos que se ficieron pa promocionar Asturies dende 1929 a 1987, tanto dende instancies oficiales como privaes. Tán dende los más antiguos realizaos en 1929 por Joaquín Vaquero Palacios pal Patronatu Nacional de Turismu y por Mariano Moré pa la Esposición Iberoamericana de Sevilla hasta los primeres editaos en 1984 pol gobiernu autonómicu del Principáu d'Asturies fechos por Juan Gomila. Otros artistes y ilustradores de sonadía representaos na esposición son Alfonso, Morell o Teodoro Delgado. Toos ellos usaron pa esta publicidá turística un llinguaxe gráficu modernu y vanguardista.
Como complementu d'esta esposición, na valla esterior del Muséu del Pueblu d’Asturies van esponese mientres tol branu y seronda una reproducción d'once d'estos cartelos turísticos d'Asturies.