«Hai muncho camín per percorrer na promoción del asturianu», afirma'l conceyal nuevu de Deporte y Llingua d'Avilés

G.G.

AGORA

Ayuntamiento de Avilés.
Ayuntamiento de Avilés. AYTO. AVILÉS

David García ye miembru de Cambia Avilés, que pasa a asumir les competencies de la llingua

22 jun 2023 . Actualizado a las 13:11 h.

El nuevu conceyal de Deporte y Llingua d'Avilés, David García Álvarez, afirmó esti xueves qu'asume qu'hai «muncho camín per percorrer nel desarrollu de les polítiques de promoción del asturianu dende l'ámbitu municipal».

L'alcaldesa d'Avilés, la socialista Mariví Monteserín, presentó esti miércoles l'asignación de competencies a caún de los doce conceyales que formen el Gobiernu municipal, cuatro d'elles en manes de Cambia Avilés, la confluencia local d'IX y Podemos.

García ye miembru de Cambia Avilés y el conceyal nuevu de Deportes y Llingua, depués de que nel alcuerdu de gobiernu esta formación pasara a asumir les competencies de promoción de la llingua asturiana.

El conceyal nuevu declaró que «ye ceo pa tener una idea formada sobre'l funcionamientu internu de les árees que como conceyal asumo», anque afirmó que ta «atopando la disposición y ganes de trabayar meyores del personal técnico adscritu a les mesmes».

Nesi sentíu, afirmó que va «trabayar intensamente pa llograr los oxetivos de gobiernu que marquemos, a los qu'espero contribuyir firmemente dende les mios responsabilidaes». Asina, indicó que «hai muncho camín per percorrer nel desarrollu de les polítiques de promoción del asturianu dende l'ámbitu municipal». «Pa eso trabayu dende'l primer minutu», sentenció, informa Europa Press.