Los populares dicen que ye «namás que se modifique ún d'ellos de forma puntual» y «nun contradiz n'absoluto» la Llei d'Usu del asturianu
16 jun 2023 . Actualizado a las 13:26 h.Un de los puntos claves d'alcuerdu del PP cola estrema derecha en distintos conceyos ye la repulsa a tolo que suene a llingua asturiana. En Tinéu púnxose'l focu na toponomia tradicional. Sin embargo, el PP d'Asturies afirmó que l'alcuerdu ente esta formación y Vox pa que la 'popular' Montserrat Fernández sía alcaldesa de Tinéu «nun contradiz n'absoluto» la Llei d'Usu del asturianu.
Esta norma, aprobada en 1998 pol Executivu de Sergio Marqués, establez que los topónimos tradicionales de la comunidá autónoma tienen que ser oficiales. Sicasí, nel alcuerdu ente'l PP y Vox nesi conceyu contémplase reclamar al Principáu cada trimestre revertir el topónimu tradicional de 'Tinéu'.
En redes sociales destacóse que la denominación yá apaez en testos del sieglu XIX:
Fontes del PP d'Asturies aseguraron a Europa Press que lo que se ta pidiendo nun ye que s'eliminen los topónimos tradicionales, «namás que se modifique ún d'ellos de forma puntual, el que da nome al conceyu y que, por decisión de la Xunta de Topónimia, fixo desaparecer el topónimu 'Tineo' que yá nun se pue usar pa implantar n'esclusiva'l de 'Tinéu».
«Lo que pidimos ye que dambos puedan usase y s'apruebe 'Tineo/Tinéu'», aseguraron fontes de los 'populares' a Europa Press.