Víctor Suárez va representar a la Wikipedia n'asturianu nel «Wikimedia minority languages meeting» de Porto
AGORA
Esti vienres va entamase, na Facultá de Lletres de la Universidá de Porto, l'alcuentru denomáu «Porto Meeting. Wikimedia minority languages meeting»
15 jun 2023 . Actualizado a las 14:42 h.A lo llargo de la fin de selmana, la Universidá de Porto va acoyer l'alcuentru col oxetivu de llevar a cabu un análisis y reflexón fonda alredor de la situación actual de les Wikipedies nes llingües de la enciclopedia llibre, poniendo'l focu n'aquelles que viven una situación de minorización. Habrá representación de les Wikipedies en catalán, gallegu, eusquera y asturianu, ente otres. L'eventu va axuntar a individuos espertos y comprometíos col desenvolvimientu de les distintes versiones de Wikipedia, proyectu que ta traducíu a más de 300 llingües.
En representación de la Wikipedia n'asturianu, va asistir el maestru y divulgador del conocimientu llibre Víctor Suárez, que lleva collaborando y creando conteníu nel proyectu dende 2006 y que tien llarga esperiencia en promover el proyectu per aciu de talleres o charres y la so participación n'otros alcuentros nacionales ya internacionales como los celebraos en Ciudá del Cabu, Montreal o Yereván (Armenia), quien va dar una visión detallada de la trayectoria y estáu actual de la Wikipedia n'asturianu, qu'a pesar de la falta d'oficialidá del idioma, caltien un nivel altu d'artículos y allúgase nun puestu destacáu nel ránking ente idiomes asemeyaos con Wikipedia, gracies a lo que, ente otres cuestiones se produxo tamién una xuba del asturianu nel «Barómetru internacional de les llingües» ellaboráu pol Ministeriu de Cultura de Francia.
L'eventu va contar amás cola invitación d'espertos que van dar una visión en conxuntu de la situación de cada llingua y la delegación asturiana va tar representada por Inaciu Galán, profesor y académicu de la llingua asturiana, que va ofrecer el vienres una charra titulada «L'asturianu, una llingua caminando hacia la oficialidá».