Les solicitúes van poder formalizase hasta'l 21 de xunetu
05 jun 2023 . Actualizado a las 12:12 h.El conceyu de Gozón abre güei el plazu de la convocatoria d'ayudes económiques destinaes a beques comedor del alumnáu de los centros públicos d'Educación Infantil, Primaria y ESO pal cursu escolar 2023/2024.
L'oxetivu de la prestación económica, que la so dotación total xube a 40.000 euros, ye favorecer la conciliación llaboral de los proxenitores, sofitar a les families con dificultaes pa costiar esti serviciu y ufiertar una midida de sofitu familiar pa menores con faltes d'atención qu'implique desprotección.
Les unidaes familiares con menor renta per cápita van tener preferencia pa la concesión d'estes ayudes. L'añu pasáu, el consistoriu gozoniegu aprobó otorgar un total de 36 beques comedor al alumnáu de los colexos públicos La Canal (15) y La Vallina (21) pal cursu escolar 2022-2023.
Les solicitúes pueden presentase hasta'l 21 de xunetu de manera presencial nel rexistru del conceyu o al traviés de la sede electrónica. La documentación y los formularios tán disponibles na páxina web municipal: www.ayto-gozon.org.