Dende va unes décades, al entamu la primavera y na seronda, prodúcense fueos de gran intensidá nel país. Ye un problema que va pa endémicu amás qu’algama mayores dimensiones cada temporada. Hai factores que lo amplíen. La falta de personal na guardería, los pocos medios de los bomberos, la falta de prevención, falta de vixilancia ya investigación escosa, ente otros. Amás son tiempos de cambéu climáticu y seques.
Pero’l causante del desastre ye l’home. Son cuasi na so totalidá fueos provocaos por elli, dellos pol descuidu, o non, de dellos ganaderos, y dellos malintencionaos por persones que busquen facer dañu por un supuestu beneficiu propiu que ponen per delantre de la seguridá del grupu y la integridá del patrimoniu de la comunidá.
Tamién inflúi’l desdexamientu de l’Alministración y les lleis permisives coles zones quemaes como la Llei de Montes de 2017 que permite‘l pastoréu nesos llugares, enantes con décades d’acotamientos pa rexenerar l’arbolíu.
Ye una cuestión repetida añalmente pa la que nun se fai una igua afayadiza dende’l Principáu. ¿Paraísu natural? Una imaxe turística pa un turismu que dexará de venir col aumentu del peligru de ver quemase la zona onde vienen a esfrutar del verde del país ya inclusive pola posible evacuación de les mesmes cases rurales. Sacante’l peligru mortal que supunxeron y suponen, desficieron bienes y viviendes. Fueos carecíos per toa Asturies, qu’aportaron dende la costa de Cadavéu hasta la Reserva Natural Integral de Muniel.los. Qu’esaniciaron hábitats y especies en gran cantidá. Asina como patrimoniu cultural y etnográficu únicu. El mayor siniestru de la hestoria de los fueos n'Asturies, con 32000 hectárees amburaes. La desplicación de la Fiscalía Delegada de Mediu Ambiente d’Asturies sobre les causes foi bien nidia.
¿Cuántos deteníos hai cada añu polos fueos? Pocos.
¿Cuántos incendiarios paquen pola estroza que causen a la natura y les vides y propiedaes de los asturianos y asturianes que soporten esta plaga? Perpocos.
¿Cuáles son les penes? Les mínimes.
¿Erosión del tarrén tolerada polos gobiernos del momentu? Quiciabes.
¿Repónense los árboles con especies autóctones? Pídese.
Nun ye casualidá. Nun ye usu tradicional. Hai motivaciones vandáliques. Ye delincuencia.
Urxe finar con esta amenaza crítica. Hai d’atayala pa nun desfacer esti país ente les llapes. Convencer, ente toos, a los responsables de los fueos de la destrucción que xeneren.
Pa sobrevivir a un infiernu cíclicu evitable. P’afitar que nun se repitan los fueos nel supuestu paraisu natural.